Tui pump khawl hlawhtling taka enchhin a ni

August 26, 2022 atanga chhia Tuikum lui a PHE Department ten Electric hmanga Tui an pump-na khawl chu Inrinni zan khan siamthat niin nimin zing khan hlawhtling taka enchhin a ni.
PHE Department ten Tuikum lui atanga Tui pump nana an hman ber, Electric khawl hi Aug. 26, 2022 khan a chhiat avangin hman theih loh in a awm a, khawl chhia hi thlakna mai a awm loh avangin Company-ah a mil tur Order siamin tun thla ni 12 khan a Spare parts hi Aizawl an rawn thawn thleng a, hemi zan la la hian Serchhip lamah rawn lak nghal niin a tuk September 13 atang khan a bun hna thawh nghal a ni. He an hnathawh hi PHE-a Sr. SDO Er. Samuel LR. Ralte leh Section Officer chuan a hmunah vilin Emergency Team, Driver te leh Tuikum Shift Duty ten ni 5 leh zan 5 zet khawl bun leh khawl hlui nena inmillo lai siamthat hna an thawh hnuah Inrinni zan dar 11:00 khan darkar khat chhung enchhin a ni a, hlawhtling taka enchhin a nih hun ah nimin zing dar 5:00 atang khan dan pang-ngaia tui pump hna hi thawh a ni leh ta a ni.

Hetianga Tui pump-na electric khawl a chhiat chhung hian Diesel khawl hmangin tui hi pump a ni a, tui pump-na senso hi a san bakah khawl hi chawlh tir ve zeuh zeuh a tul avang leh hemi chhunga lo inbanlek tur a awm loh avangin Tui pump kawngah harsatna a thleng nasa hle a, hei mai bakah hian Diesel khawl chak tak hi kum 20 chunga upa Pipeline ten a zawh meuh tawh loh avangin Tuikum leh Khawtetlang inkar ah Pipeline chhia a tam phah in hei hian Tui pump kawngah harsatna nasa tak a thlen thu thawktute chuan an sawi bawk a ni.