Union Minister in Mizoram a rawn tlawh mek

Sawrkar Laipui-a Minister of State for AYUSH leh Women & Child Development Dr. Munjpara Mahendrabhai chuan nimin khan Aizawl rawn thlengin nimin tlai khan Mizoram a AYUSH Directorate leh Women & Child Development Department hnathawh leh hmalakna te thlirletna hun a neihpui.

Aijal Club-a he hun hmanna ah hian Dr. Munjpara Mahendrabhai chuan a enkawl Ministry 2 – AYUSH leh Women & Child Development chuan ram pumah hmalakna tha takin an kalpui mek niin a sawi a. Mizoram-ah pawh mipuiin AYUSH lam thiamna te an hriselna atan an hmang tangkai mek chu lawmawm tiin Ayurveda te phei chu hmasanga atangin India in hriselna chungchanga System of Medicine a neih leh kalpui a ni a, mipuiin an hlawkpuiin an tangkaipui hle a ni, a ti a. AYUSH hi nunphunga (way of life) kan neih a pawimawh a, chuvangin AYUSH hi tun aia mipui te’n an chhawr tangkai theih nan AYUSH awareness ah hma kan lak lehzual a ngai tih a sawi bawk.

He hunah hian Health & Family Welfare-a Principal Secretary Esther Lalruatkimi leh Secretary Social Welfare & Tribal Affairs Arun Mishra chuan AYUSH Directorat leh Women & Child Development Department hnuaia hmalakna hrang hrangte an tarlang a, he huna tarlan danin Mizoram pumah a nghet leh nghet lovin AYUSH Doctor 89 leh Support Staff 99 an thawk mek a, AYUSH hian kum 2021-22 chhungin khaw 12-ah Medical Camp buatsaihin damlo 2882 an en a. Mizoram hian Thenzawl-ah khum 50 awmna AYUSH Damdawi In a neih bakah District tam zawka khum 10 awmna AYUSH inenkawlna a nei tawh bawk a. Mizoram pumah AYUSH Health & Wellness Centre 38 neih tumin hma lak mek a ni, heng zinga a tam zawk chu hawn a ni tawh a ni. Aizawl-ah cheng nuai 1500 senga sak tur khum 50 awmna AYUSH Damdawi In leh Saitual-ah cheng nuai 750 senga sak tur khum 10 awmna AYUSH Damdawi In te chu sanctioned a ni tawh bawk.

Women & Child Development hnuaiah Mizoram pumah ICDS hnuaiah Aganwadi Centre 2244 a awm mek a, hengte hian an mahni pualin building an nei vek tawh a. ICDS hi tunhnaiah khan a hming hi Saksham Aganwadi tia thlak niin Poshan 2.0 an kalpui mek a ni. Poshan 2.0, naupang kum 3 hnuai lam leh nu naupai leh nau pawm te chawtha pekna Scheme hnuaia beneficiary 1,20,586 an nei mek a. Hengte hi chaw tha, thil hrang hrang chi 13 kum khata ni 300 an pe thin a ni. Heng bakah hian Central Scheme danga hmeichhe naupang kum 14 leh 18 inkar beneficiaries 5506 an nei mek bawk a ni. Mizoram hian tum hnih lai ICDS a kalpui that vangin National Award an dawng tawh a, heng ah hian lawmman sumfai cheng nuai 250 an dawng tawh bawk a ni.

Comments

Popular posts from this blog

Volleyball S/F khel dawn