Serchhip-a NSS Unit hrang hrang ten NSS Foundation Day pualin hun an hmang
NSS Foundation Day pual hian Govt. Serchhip College NSS Unit leh Eco Club te chuan UD&PA Department te nan tangkawpin nimin khan Govt. Serchhip College Seminar Hall-ah hun an hmang a, he hun hi Govt. Serchhip College NSS Unit-a Programme Officer H. Lalchhanhima chuan kaihruaiin Programme Officer bawk Dr. Lalhmangaihzuali chuan NSS Foundation Day chungchang a hriattur pawimawhte a sawi a ni. Seminar Hall-a Programe hman zawh hnu hian Serchhip Bazar-ah UD&PA in 'Zero Waste Week' an hmanlai mek tawiawm nan leh NSS Foundation Day lawmna chi khat atan Serchhip Bazar leh a chhehvelah Cleanliness Drive neih a ni a, zirlai naupang ten bawlhhlawh awm ang ang an chharkhawm a ni.
.jpeg)
Govt. Higher Secondary School Serchhip chuan NSS Foundation Day lawmna leh Annual Sports kharna hi nimin khan Serchhip Auditorium-ah an hmang a, he hun hi GHSS Serchhip-a NSS Programme Officer MC. Laltanpuia chuan kaihruaiin he School-a Lecturer Samuel Saithuamliana'n NSS din dan leh NSS nihphungte a sawi a, School Principal PC. Thanhranga pawhin thu sawiin Annual Sports, 2022 a khar a ni. He hunah hian kumin a Annual Sports an hman a tithate hnenah lawmman semna neih niin a pumpui-ah Red House chu an champion a, zirlai ten an thiamthil chi hrang hrang an entir bawk.
Brilliant Higher School te chuan NSS Foundation Day pual hian New Serchhip-a Vantlang hmun hrang hrang tifaiin volunteers mi 175 ten New Serchhip Hall leh a chhehvel, Mercy Hospital bul leh Bazar hmunte an tifai a, heng Volunteer te hi Programme Officer pathum ten ho in hemi hnu hian an School Hall-ah Legal Awareness Campaign an nei nghal bawk a, he hun hi NSS Programme Officer Lalrinnunga Tochhawng chuan kaihruaiin Serchhip-a Judicial Magistrate leh District Legal Service Autority-a Member Secretary Zosangzuali chuan Child Right chungchanga hriat tur pawimawh te a sawi a, Lalrosanga Colney, Advocate in Social Media chungchanga dan leh hrai hriat tur hrang hrang a sawi bawk a ni.