Serchhip Mat Phai-a Buh hmun zau tak chu tunhnaiah Sazu puang ni ngeia hriat ten an seh chhia a, hei vang hian nimin khan Serchhip-a Agriculture Department bultumin Tur hmanga Sazu hrai dan inzirtirna neiin Zawlpui-ah Sazu hrai runpui neih a ni.
Tunlai hian Mizoram hmun hrang hranga buh hmunte Sazu in a bei mek a, Raw Tam (Rawnal) vanga Sazu te hi lo hluar ta nia ngaih a ni a. Heng Sazu te hian Serchhip District chhung khaw thenkhata Tlangram Lo-a buh te seng tur awm lo khawpin an lo suasam sak tawh a, tunhnai mai khan Serchhip Zawlpui Zau Leilet a tharrang buhte pawh Sazu hian an beih ve leh tak avangin niminpiah khan Agriculture Department mithiam te chuan a hmunah an tlawh a, thil awmdan enfiah a nih hnuah buh hmin chho zel tur chhan theih beiseiin Sazu hrai runpui an nei ta a ni.
Zawlpui zau-a leilet neitute hnenah hian Serchhip-a Asst. District Agriculture Officer (ADAO) Lalrinawma chuan Sazu Tur hman dan leh hrai dan a takin a zirtir hmasa a, Sazu laka Buh veng tur chuan Tur a hrai a that ber thu sawiin, Tur a kan hrai dawn anih chuan a huho a inthurual a hrai a ngaih thu leh a rualkhaia Tur a Sazu kan hrai lo anih chuan midang tan pawi a khawih theih tho avangin a huho zel a inlungrual taka tih a ngaih thu a sawi a, Sazu tur chu mihringte leh ran dangte pawhin an huat ve tho avangin fimkhur a ngaih thu leh hmun thenkhatah chuan Sazu hrai lova, Thang-a awh a a sa ei thlang zawk an awm thu leh chu chu thil tha ber anih loh thu a sawi a, Sazu laka Buh ven nan Tur a hrai chu kawng tha ber a nih thu a sawi a. Hemi hnu hian Sazu Tur hi loneitute hnenah sem nghalin a huhovin a hrai runpui hi an nei zui ta a ni.
Tun tuma Sazu hrai nan hian Sazu tur chi hnih, Zinc Phosphite (Sazu tur dum dip) leh Roban (Sazu Cake) te hman an ni a. Zinc Phosphite (a dum dip/phut) hi Buh kan hmui-ah phul a lehkhaa tuamin Mau bur emaw, Changel kawr khawrpum chhunga thun hnuah Sazu ei tura tawktarh tur a ni a. Tur pahnihte hnathawh dan chu Zinc Phosphite hi Sazu in an ei atanga darkar 4 hnuah an zeng thin a. Roban (Sazu Cake) hi chu an ei veleh an kawchhungah thisen chhuak (Internal Bleeding) siamin an thihpui mai thin thung a ni.
Serchhip Zawlpui Zau-a Field Management Committee (FMC) hruaitute chuan kum dangah Sazu avanga harsatna an la tawh ngai loh tawh thu leh kumin a hetiang lo thleng hi an tan thil thar anih thu an sawi a. Agriculture Department ten an harsatna hriaa Sazu Hrai runpui rang taka an neihpui chu lawmawm an tih thu an sawi a. Buh te an hmin chhoh mai dawn avangin Sazu laka an him ngei theih nan sawrkarin ngaihsak zui zel se an duh thu an sawi bawk.
Serchhip Zawlpui Zau-ah hian chhungkaw 68 chuangin Buh hmun an siam mek a, kumtin Buh Phur 7000 chuang an thar chhuak thin a ni.
Comments
Post a Comment