COVID-19 hri kai enkawllai 185 la awm mek

Nimin tlai thleng khan Mizoram-ah COVID-19 hri kai enkawllai mi 185 an la awm.

Niminpiah khan Mizoram-ah Sample 271 enfiah leh niin heng atang hian COVID-19 hri kai mi 37 hmuh an ni a, Sample en atanga chhutin za zela 13.69 te chuan hri an kai a ni. Heng hri kai hmuh thar te hi Rapid Antigen Test hmanga Sample enfiah 259 atanga hmuh te vek an ni a, ZMC-a RT-PCR Laboratory-a Sample enfiah 12 atangin hri kai an awm lo thung. Niminpiah-a COVID-19 hri kai hmuh zinga mi 14 te chu Aizawl District-a hmuh te an ni a, Saitual District-ah 6, Khawzawl District-ah 5, Lunglei leh Mamit District-ah 4 ve ve, Champhai District-ah mi pahnih leh Serchhip leh Lawngtlai District-ah mi pakhat ve ve te an ni.

Nimin khan Mizoram District 5 atangin COVID-19 hri kai mi 24 te chu anmahni enkawlna hmun atanga chhuahtir an ni ve leh bawk a, heti hian nimin tlai thleng khan Mizoram-a COVID-19 hri kai hmuh tawh chu 2,38,226 niin an zinga 2,37,318 te chu enkawl dam an ni tawh a, hri kai hmuh atanga za zela 99.62 te chu enkawl dam ni tawhin hri kai enkawllai 185 an la awm a, hri kai zingah mi 723 an boral tawh bawk a ni.

District hrang hrangah hri kai enkawllai hi an tlem sawt viau a, hri kai enkawllai tamna ber chu Aizawl District la niin mi 73 enkawl an la ni a, Saitual District in dawtin mi 34 enkawllai an la awm bakah Lunglei District-ah mi 21 enkawl an la ni bawk. Nimin tlai thleng khan Siaha leh Hnahthial District-ah hri kai enkawllai an awm tawh lova, Kolasib District-ah mi pakhat enkawl la niin Lawngtlai District-ah mi 3 leh Champhai District-ah mi 7 te chu hri kai enkawllai tlem zualna District an ni.