Kum 36 chhungin Mizoram-ah mitthi 1,67,002 awmin nau piang naupiang 7,13,508 an awm thung

Mizoram-ah kum 1985 atanga nikum 2021 inkar chhung khan nau piang 7,13,508 leh mitthi 1,67,002 chhinchhiah an awm a, kum 2021 a mitthi chhinchhiah zingah kum 70 chunglam (70 and above) an tam ber. Kum hmasa lam nen a khaikhinin, nikum a mitthi punna a sang hle bawk.

Economic & Statistics department buatsaih ‘Annual Report of Registration of Births & Deaths, Mizoram, 2021’ a tarlan a nih danin, nikum chhunga Mizoram-a mitthi chhinchhiah mi 8,101 zingah kum 70 chunglam mi 2,663 an awm a, kum 55-64 inkar mi 1,169 awm bawkin, kum 35-44 inkar mi 1,094, kum 45-54 inkar mi 1,052, kum 25-34 inkar mi 624, kum 65-69 inkar mi 569, kum 1 hnuailam mi 44, kum 1-4 mi 94, kum 5-14 mi 128, kum 15-24 inkar mi 252 an awm. Mitthi chhinchhiah zawng zawng zinga 5,156 te chu mipa niin, midang 2,945 te chu hmeichhia an ni a, Hmeichhia aiin mipa 2,211 in an thi tam zawk a ni. Hetihlai hian nikum chhung khan Mizoram-ah naupiang 24,314 chhinchhiah a ni a, chung zinga 12,424 chu mipa niin, 11,890 chu hmeichhia an ni a. Hmeichhia aiin mipa naupiang 594 in an tam zawk thung a ni.

Kum 1985 atanga nikum 2021 inkar chhung khan Mizoram-ah nau piang chhinchhiah mi 7,13,508 an awm a, hemi hun chhung a nau piang tam ber kum chu 2012 niin nau piang 26,042 chhinchhiah an awm a, hemi kum hian mitthi chhinchhiah 6,503 an awm thung.

Hetihlai hian kum 1985-2021 chhung a mitthi chhinchhiah zat chu mi 1,67,002 an tling a, hemi hun chhung a mitthi chhinchhiah tam ber kum chu kum 2021 kha niin, mi 8,101 mitthi chhinchhiah an awm a, kum hmasa aia mitthi chhinchhiah tamna chu 1,398 a tling.

Comments

Popular posts from this blog

Tukverh-a tlasual boral