SDBBA Season Opening Tournament-ah BC Serchhip Kawnpui chak ber

Grace Pharmacy SDBBA Season Opening Tournament chu nizan hmasa khan khelh zawh niin Basketball Club Serchhip Kawpui (BCSK) te an champion.

Serchhip District Basketball Association buatsaih Grace Pharmacy SDBBA Season Opening Tournament hi tun thla ni 14 atang khan Serchhip Hmar Veng-a SDBBA Basketball Court-ah khelh a ni a, he Tournament hi zan lamah khel thin niin Serchhip khawchhunga Basketball Club 5 leh Chhingchhip leh Thenzawl atangin Club pakhat ve ve, an vaiin Team 7 an tel a, nizan hmasa khan Final khelh niin Basketball Club Serchhip Kawnpui (BCSK) chuan Saron Basketball Club te chu 41-35 a hnehin District Champion an ni ta a ni.

Tun tum Tournament-ah hian Most Valuable Player (MVP) atan BCSK player Benjamin Vanlalawia chu thlan niin Rising Star atan Chawnglianzela, Thenzawl BC chu thlan a ni bawk.

Serchhip District Basketball Association chuan he Tournament a hlawhtlin theihna tura tel zawng zawngte leh sponsorship petute chungah lawmthu an sawi a, he Tournament hi zan lamah khelh thin niin a hmuna entu pawh an thahnem thin hle a, heng mi te zawng zawng chungah pawh hian SDBBA chuan lawmthu an sawi bawk a ni.