Veng 17-ah LPG Home Delivery kalpui mek niin harsatna avangin Veng tam zawkah kalpui thei lo

Food, Civil Supply & Consumer Affairs Department thawktute chuan Aizawl khawpui chhunga Veng 15 bakah Kolasib-a Tumpui Veng leh Serchhip P&E Veng-ah te LPG Home delivery kalpui a ni tawh tih sawiin, “Home delivery kalpui tawh Veng hi inchhir an la awm lo,” an ti.

Food, Civil Supply & Consumer Affairs Department thawktute chuan LPG Home Delivery hi a tira kalpuina Veng pali- Aizawl-a College Veng, Dawrpui, Zonuam leh Falkland Veng te bakah Veng dang 11-ah te kalpui a ni tih a sawi a. Indian Oil Corporation (IOC), FCS&CA Department leh Aizawl khawpui chhunga Gas Agency 11 te chuan an huamchhunga Veng thlanbik 3 theuh ah te Home Delivery hi kalpui nise tiin heng Veng thlanbik 33 zingah hian lo kalpui tawhna Veng 4 bak Veng dang 29-ah kalpui tum anih laiin harsatna neuh neuh avangin Veng 15 ah chiah kalpui theih a ni ta tih an sawi a ni.

LPG Home delivery kalpui theih a nih loh chhan hi chi hrang hrang a awm thu pawh sawiin, “Veng thenkhatah chuan Gas book tu an awm lo a, thenkhatah chuan book an tlem lutuk avangin Agency te tan sem ngaihna a awm lova. Veng thenkhat chuan Smart Phone nei lo an tam tih an sawi a, chubakah ni leng-a Gas lo nghah kha harsa ti an awm bawk a, hmun thenkhatah chuan Home Deliver man Rs. 70 hi to an ti bawk a. Hei bakah hian Local Council thenkhat hi an la hmin chiah lo nia a lan bakah KYC update mek vang leh thildang neuh neuh engemaw hi a la awm a ni,” an ti.

LPG home delivery chu a tha nia sawiin FCS&CA thawk te chuan, “Tuna Home Delivery kalpui tawh Veng hi inchhir an la awm lova, a hmaa Point Delivery anga kalpui leh hi an duh tawh lo a ni,” an ti a. Tuna home delivery man bur khat zelah Rs. 70 chu Aizawl Veng zawng zawngah kalpui anih hun chuan tun ai hian a hniam zawk dawn niin an sawi bawk.

Mizoram-ah chuan LPG Home Delivery hi ni 5.9.2019 khan Aizawl-a Veng 4-ah Pilot Projects angin kalpui tan a ni a. Hripui vanga hun engemaw chen chawlhsan anih hnuah April 1, 2022 atang khan Veng thlanbikah te kalpui tura ruahman leh a ni.