Myanmar atanga raltlan te uluk lehzuala enzui turin ti

Myanmar atanga Serchhip District-a raltlan rawn lut te chevel chu uluk lehzuala enzui tura tih a ni.

Tunhnai khan Serchhip District-a Nodal Officer for Myanmar Refugee chuan Serchhip District-a VC hrang hrang hnenah lehkha thawnin Myanmar atanga raltlan rawn lut te hi Mizoram sawrkar hmalakna in chhinchhiah an nih thu leh ID Card pawh siam sak zel an nih thu tarlangin, Mizoram sawrkar chuan thuneitute hriatpui loh a heng raltlan te duh duha an veivah hi a remchang lo nia a hriat thu leh an kalna chin chhinchhiah zel tul a tih thu a tarlang a. Hei vang hian Serchhip District chhunga raltlan te chuan Serchhip District an chhuahsan dawn a nih chuan anmahni bialtu VC an hriattir zel tur a nih thu leh an kalna tur chin pawh chhinchhiah zel tur a ni tih a tarlang.

Hei bakah hian sawrkar chuan heng ral-tlan te hi chhinchhiahin DC te kaltlangin Identity Card siam sak an nih thu leh District an chhuahsan dawn a nih chuan VC te kaltlangin an ID Card hi a petu hnenah an thehlut tur a nih tih pawh a tarlang a, hei hi raltlan ten an zawm tha lo nia hriat a nih thu leh hei vang hian VC te chuan an huamchhunga Myanmar raltlan mikhual an neih te chu DC Office atanga ID siam an lakchhuah/pekchhuah rualin an ram (Myanmar) ID chu laa kawl sak tur a nih thu a tarlang bawk a ni.