Serchhip-ah ‘World Pharmacist Day’ pualin ruihhlo hmansual chungchang zirhona neih a ni
World Pharmacist Day puala Marian H/S Serchhip-a hun hman hi Serchhip District Hospital-a Head Pharmacist R. Sanghmingthanga chuan kaihruaiin 'World Pharmacist Day' hi September 25-ah hman thin ni mah se kumin hian Pathianni-ah a tlak avangin nimin September 26-a hun an hman thu a sawi a, Mizoram State Pharmacist Council chuan kumdanga an la tih ngai loh angin kumin hian District tina hun hman tura a ruahman anga he hun hi hman a nih thu leh District tina zirna In pakhat ah tal ruihhlo leh Damdawi hmansual chungchang inzirtirna nei tura a ruahman anga he hun hi hma a nih thu a sawi bawk. Serchhip District Hospital-a Head Pharmacist chuan tunhnaiah Serchhip mai ni lo, Mizoram hmun hrang hrangah ruihhlo hmansualna a hluar hle tih pawh sawiin, a ngawl vei tawh te tan sim leh mai chu thil harsa tak a nih avangin zirlaite tan tih chhin loh chu thil pawimawh a nih thu a sawi a, ruihhlo dona kawngah pawh mitin te kan tanrual a tul thu leh a la ti ve lo ten an tih ve lohna tura theihtawp chhuah a ttul thu te a sawi bawk.
He Awareness Campaign in a tum ber chu naupang leh tleirawl zawk, ruihhlo hmansual kawng la inhnamhnawih ngai lo leh lo hmangsual tawh zingah pawh la hmang nasa lo te hnena ruihhlo in nghawng tha lo a neih dan te inzirtira a la ti ve ngai lo te ti lo tura ven nana inzirtirna neih te a ni a. He hunah hian Health Department Serchhip-a Food & Drug Administration (FAD) Asst. Director Sarah Laldintluangi chuan hriselna atan tha lo ei leh in kawnga fimkhur a tulna leh Damdawi hmansual in nghawng tha lo a thlen hrang hrangte zirlai kalkhawmte chu a lem nen a hrilhfiah a. Serchhip CMO Office atangin Malsawmtluangi, Pharmacist chuan Damdawi hmansual hlauhawm dante, ruihhlo Heroin No. 4 nihphung hrang hrang leh a ngawlvei (addict) a awlsam dan te sawiin, ruihhlo la ti velo, naupang zirlai leh rawlthar leh tleirawl zawk te tana hriattur pawimawh hrang hrangte a sawi bawk a. Anni bakah hian Marian H/S Headmaster Rev. Father Praveen Farnandes pawhin thu a sawi bawk a ni.
Comments
Post a Comment