Latest News

Aizawl New Market a eizawngte an mangang

Aizawl New Market-a sumdawng pawl hrang hrang te chuan Mizoram sawrkarin an awmna building sa mai tura a tih laia Vawiin thlenga a la sak loh avanga an mangan thu an sawi a. Pawisa a awm tih sawi reng chunga an awmna tur sak a la ni lo chu sumdawngte rahbehna ah an ngaih thu leh an ngaihthiam thei loh thu an sawi a ni.

New Market Joint Sumdawng Association te hian nimin khan Press mite sawmin an harsatna hi an sawipui a. New Market Joint Sumdawng Association President R.Lalthangzama chuan, “Pawisa a awm tih sawi reng chunga kan awmna tur sak a la ni lo hi sumdawngte rahbehna ah kan ngai a, kan ngaithiam thei lo a ni,” a ti.

New Market Tender chungchang sawiin New Market Joint Sumdawng Association President chuan, “January thla khan Market building sakna atan hian tender chhuah anih dawn thu sawrkar lam chuan an sawi a, mahse an chhuah lo a. UD&PA changtu Deputy Chief Minister chuan March thlaa Session ah kum thara Tender tur anga a sawi chungin Vawiin thlengin Tender a la ni lo a. Heti ngawta sawrkarin min namnul hi na kan ti hle a ni,” a ti bawk.

New Market Joint Sumdawng Association hruaitute chuan New Market thiah takah khan eibel bera hmangtu chhungkua 1228 an awm niin an sawi a, Foreign lane tia hriat thin, Aizawl City Center tia thlak tak hi kum 2018 khan thiah a ni a, helai hmuna dawr awm 128 te chu a bula NEC Building-ah insawn tir an ni a, Building thar sakna tur hi sum awm sa vek, kum 3 chhunga sak zawh tura ruahman a nih laiin, Contractor hnenah Sawrkar-in sum a pek that loh avangin hna a chak loh phah a. Bazarpui Main Building phei chu kum 2020 July thlaa thiah a nih hnuah kutthlak ala ni lo hrim hrim a. Mihring tan a him lo nia hriat avanga thiah a ni.

Comments

Popular News (Last 30 Days)