COVID-19 hri kai enkawllai mi 164 awm mek

Mizoram-a COVD-19 hri leng dinhmun chuan ziaawm lam a pan ve zel a, nimin tlai thlengin hri kai enkawllai mi 164 an la awm.

Niminpiah khan Mizoram-ah Sample 171 enfiah niin heng atang hian COVID-19 hri kai mi 7 hmuh an ni a, Sample enfiah atanga chhut pawhin za zela 4.10 chiahin hri an kai a ni. Niminpiah khan Mizoram-ah Rapid Antigen Test hmang chauhin Sample enfiah a awm a, hri kai hmuhchhuah te hi Saitual District-ah 3, Lunglei District-ah pahnih leh Serchhip leh Aizawl District-ah mi pakhat ve ve te an ni.

Nimin khan Mizoram District 6 atangin COVID-19 hri kai mi 25 te chu anmahni enkawlna hmun atanga chhuahtir an ni leh a, heti hian nimin tlai dar 5:00 thleng khan Mizoram-a COVID-19 hri kai hmuh tawh chu 2,38,403 niin an zinga 2,37,516 te chu enkawl dam an ni tawh a, hri kai zinga za zela 99.63 te chu enkawl dam ni tawhin hri kai enkawllai 164 an la awm a, hri kai zingah mi 723 an boral tawh bawk a ni. Tun dinhmuna hri kai enkawllai tam berna Aizawl District-ah mi 48 enkawl niin Mamit District-ah mi 47 enkawl an la ni bawk.