Mizo Hnam inpumkhat zawnga kal a ngai - Lalduhoma

Zoram Peoples Movement (ZPM) Leader Lalduhoma chuan, “Mizo hnam hrang hrang te hi inlahrang zawng ni lovin inpumkhat zawnga kan kal a ngai a ni,” a ti.

Pang Zirlai Pawl (PZP) tin Inrinni kaltaa Central Hall, Venghlui-a Fresher’s Social cum Meritorious Students’ Felicitation Programme 2022 an buatsaih a hmanpuina ah he thu hi sawiin Lalduhoma chuan, “Pang hnam te hi Mizoram luah hmasa pawl zinga mi niin an lang a, kan pi leh pute hunlaia an tawng hman ah te, an thu leh hla, tunhnua ‘Tawng Upa’ kan tihah te hian ‘Pang’ tawng te pawh a tel a, hei hian hmanlai chuan kan pi leh pute nen pawh lo khawsaho a, chengho thin an ni tih a tichiang hle a ni,” a ti. 

Inpumkhat pawimawhna sawiin, “Zohnahthlak hnam hrang hrangte hi a inthendarh zawnga kan awm chuan tih tham lohah kan chhuak dawn a. Kan vai hian unau vek kan ni a, kan hnam hi ropui taka a dinchhuah theihnan theihtawp kan chhuah a tul a ni,” a ti a. Pang zirlaite chu theihtawpa zirna kawnga tan la a, eirukna dopuiah sawmin, “Eirukna (Corruption) hi kan ram leh hnam hmelma, min tichhetu a ni,” a ti bawk.