Hna chawl turin hrilh nawn

National Highway-54 in Serchhip khawpui a helna tur kawng laih mek chu chhunzawm leh a nih hnuah chawlhsan tura tih leh a ni.
Thudawn danin KRAM Infracon Pvt. Ltd. in Serchhip by-pass road an laih mek hi ‘Forest Clearance’ an neih loh avanga Environment, Forests & Climate Change Department-in Stay Order pe a hna chawlhsan a nih hnuah he Clearance hi nei lova hna an chhunzawm leh nia hriat a nih avangin nimin khan EF&CC Department Serchhip Range a RO Lalsangpuia Pachuau hovin Serchhip Sub-Hqrs. YMA Vigilance & Monitoring Committee te chuan a hmunah an enfiah a, hna hi an lo chhunzawm ngei tih an hmu a ni.

Hetianga hna an chhunzawm leh mek avang hian an hnathawhna hmun atang hian kawng lai hna thawktu-a thuneitu sang zawkte pawh biak nghal niin Forest Clearance an neih loh avanga Stay order pek an nih thu hi hrilh nawn leh niin an hna hi chawlhsan tura hrilh nghal an ni a, hnathawktute pawhin hna hi an lo chawlhsan tur thu an sawi nia thudawn a ni bawk.