Harsatna sukiang tura hmalak a tul

Harsatna sukiang tura hmalak a tul

Sawrkar laipui ruahman angin Mizoram-a National Highway-54 laihzauh leh siam that hna chu thawh a ni a, amaherawh chu he hna thawh mekah hian leivung paihna tur an ruahman sa ni lo-ah an paih avang leh hei hian kan Environment nasa taka a tihchhiat avangin mi thahnem ngai ten hma lain he hna ah hian Forest Clearance nei mumal lo chunga hna an thawk nia a lan bawk avangin an hna kallai pawh hun engemaw chen chawlhsan lailawk a ni tawh a. Tunah hian hmalakna thar a awm mai rih loh avangin he hna hi eng chen nge chawlhsan a nih dawn pawh hriat theih ala ni rih lo a ni.

Mizoram mipuite hian inkalpawhna kawngpui tha hi kan mamawh em em a, tuna kan sawi mek NH. 54 hi kan rama kawngpui kan hman pawimawh ber te zinga mi a ni a, amaherawh chu kawng lai tur tam tak laih a nih tawh avang leh heng zinga tam tak te hi siamthat a la nih hmaa hna chawlhsan lai-lawk tura hnathawktute tih an nih tak bawk si avang hian mipui ten harsatna kan tawk nasa hle niin a lang a. Tunah hian Fur ruahtui hulin hnathawh theih hun a intan leh dawn mek a, hemi hun chhunga chak zawk leh sawt zawka hna an thawh theih dan tur hi ngaihtuah a tul hle a ni.

Tuna NH. 54 laihzauh leh siamthat hna thawktute hian Dan an zawm famkim loh avanga mipui ten kawngpui chhe tak kan hmang ta reng mai hi harsatna nasa tak siamtu a ni mek a, kawng laihzauh hna thawh kan phal rih lo a nih pawhin an laihzauh tawh leh tuna mipui tana zawh harsa siamthat hna thawk tura kan nawra, Dan an zawm loh avanga mipui ten harsatna kan tawh ve reng sutkian a nih theih dan tur hi kan ngaihtuah a tul tawh a ni.