Latest News

Mizoram-ah World Bamboo Day pualin hun hman a ni

Nimin khan ‘World Bamboo Day’ pualin Aijal Club-a RB McCabe Hall-ah hun hman a ni a, he hun hi Bamboo Development Board Vice Chairman Dr. K. Pachhunga chuan khuallian niin a hmanpui a ni.

Horticulture Department buatsaiha World Bamboo Day puala inkhawm ah hian Dr. K.Pachhunga chuan Mizoram chu Mau tamna hmun leh duahna hmun a ni tih sawiin, a hlut nachang hria ram hruaitu kan nei chu kan vannei hle tih a sawi a. Kan ram in Mau hmangin malsawmna kan chang tih sawiin, “Ram leilung hausakna tam tak kan neih zingah Mau hi kan hlut thiam a, khawvel mihring tam takin Mau hmangin eizawnna an nei tih hria ila, Mau hmanga eizawnna khawvela nei zaa 70 te hi China ram mite an ni a, India pawhin Bamboo Mission neiin, Mau atanga eizawnna siam leh Mau hman tangkaina hrang hrang ngaihtuah leh hmalak chu a tum ber pakhat a ni,” a ti a. “Mizoram pawhin State Bamboo Mission, Mizoram kan nei a, hemi hnuaiah hian thlur hnihin hmalakna kan kalpui mek a, Bamboo Development Agency kaltlangin Mau awmsa hman tangkaina tam tak haichhuah a ni a, a dang leh chu mau/rua chi tha hmang a hmun zauh belh leh chin pun nana hmalak hi a ni,” a ti a. Heng bakah hian Bamboo Shoot Processing ah pawh hma nasa taka lak a nih thu a sawi bawk.

World Bamboo Day puala inkhawm hi Horticulture Department Secretary K. Lalthawmmawia'n kaihruaiin kalkhawm te lawmna thu a sawi a, Chief Minister Zoramthanga chu New Delhi-ah sawrkar laipui dawra a awm avangin he hunah hian tel thei lo mah se he ni puala 'Speech Video Message' a buatsaih chu ngaihthlak a ni a, Mizoram leilung hausakna mau leh rua te chu hlut a, eizawnna nghelnget min pe thei tih hriain, World Bamboo Day puala kalkhawm zawng zawngte duhsakna a hlan a ni.

He hunah hian Mau chingtu mi panga hnenah Best Performorning Farmers' Award, Incentive Awards Rs. 5000 leh Certificate hlan niin mi engemaw zat hnenah Exibition Participation Certificate hlan nghal an ni bawk a. Bamboo Processing & Product Development- NECBDC in a buatsaih Video Clip thlirho a ni bawk.

Chawhnu lamah Technical Session hman niin Cultivation of Bamboo, Management Practices and Product Development & Processing chungchang Addl. Director L.Lalhmingmawia Pachuau hnen atanga ngaihthlaka sawiho a ni a. World Bamboo Day, 2020-ah hian 'Bamboo for green life and sustainable development' tih thu thupui-ah hman niin, he ni hi Mau tangkaina inhrilhhriatna atan khawvel pumah hman thin a ni a. World Bamboo Day hi September ni 18-ah hman thin ni mah se Mizoram-ah chuan nimin khan hman a ni ta zawk a ni.

Comments

Popular News (Last 30 Days)