Chief Minister in sawrkar laipui dawr chhunzawm

New Delhi-a cham mek Chief Minister Zoramthanga chuan mi pawimawh te hmu chhunzawm zelin naktuk khian Mizoram rawn thleng leh tura beisei a ni.

Chief Minister Zoramthanga hian niminpiah tlai khan President Pi Droupadi Murmu chu Rashtrapai Bhavan-ah hmuin an inkawm a, Chief Minister hian Mizoram a hmalakna pawimawh hrang hrang leh hmachhawp te, a tihhlawhtlinna tura sawrkar laipui-a Ministry hrang hrang hnenah mamawh a thlen te a sawipui a. Union Minister for Road Transport & Highways Nitin Gadkari pawh hmuin Mizoram-a kawng siam leh tihchangtlun chungchang a sawipui bawk a ni.

Chief Minister hian nimin khan Union Minister of Health and Family Welfare Mansukh L. Mandaviya chu a Pisa-ah hmu bawkin Health chungchanga Mizoram mamawh a thlen a. Zoram Medical College (ZMC) chungchang sawipuiin, Mizoram in a enkawl dawn chuan a hautak dan te, mithiam ten zirchianna an neih hnua hemi chungchanga ruahmanna tha nia an hriat an siam, sawrkar laipui pawha an lo thehluh tawh thu te a hrilh a. India hmarchhak Medical College tam tak Ministry in a laksak a, a chawm ang hian laksak ve ni se tiin a dil a. Seat chungchang leh thildang hrang hrang ngaihtuah tel ngai te pawh sawi a ni. Health Ministry leh Mizoram Health Department ten an pawm tlan theih ve ve tur la sawikhawm ni se tiin Union Minister chuan Mizoram dinhmun a hriatthiampui thu a sawi bawk.

Hei bakah hian Mizoram Cancer Hospital atana cheng vbc. 10 bawr vel man khawl leina tur Central Ministry atanga puihna dil a nih thu thlen bawkin, Union Minister chuan tihhlawhtlin a nih theih nan theihtawp a lo chhuahpui tur thu Chief Minister hi a hrilh bawk a ni.

Union Home Minister Amit Shah pawh nimin tlai khan Chief Minister hian kawmin India ramin zalenna a sualchhuah kum 75 champha-phak lawmna ni pah fawmin Zokhawsang-a Assam Rifles Headquarters chu hawng turin Union Home Minister hi a sawm a, ani pawhin rawn hawn ngei a tiam thu a sawi a; a hun tur tak erawh la sawithat leh ngai a nih thu a sawi a ni. He hunah hian Home Minister chuan Myanmar chungchang a ngaihven thu te sawiin, raltlan dinhmun te sawi a ni bawk.