Thenzawl-ah MLA Cup khel dawn

/

Thenzawl Zone Football Association (TZFA) buatsaih ‘MLA Cup 2022’ chu karleh Thawhtanni khian khelh tan a ni dawn a, Team 10 te an intihsiak dawn a ni.

‘MLA Cup 2022’ khelh tur atan hian nizan hmasa khan Manager intawhkhawmna leh Tie Draw chu Thenzawl Field Veng Branch YMA Run-ah neih a ni a, he hunah hian TZFA President Liantluanga Renthlei chuan MLA Cup 2022-a Team tel zawng zawng te chungah lawmthu sawiin, ruahmanna lo siam tawh dan hrang hrang te a sawi a. Tluang taka thil kal tura an beisei laiin Serchhip Town Joint VC atanga harsatna a awm chu pawi a tih thu leh Serchhip Constituency huamchhunga infiammi, Footballer te hmakhua ngai a, he Cup an khelh ngei theih nana harsatna sutkian nan ruahmanna tih danglam a nih dan te a sawi bawk a ni.

Serchhip Bial chhunga Village Council Team hrang hrang te inelna tura ruahman MLA Cup hi VC thenkhat ah harsatna a awm tak avangin VC ten Team tir lova Club hminga khel te an awm ta bawk a, hei bakah hian Serchhip Constituency pawnlam atangin TZFA hnuaia awm te an tel phalsak ni bawkin an vaiin Team 10 an tel a, heng te hi Group pahnih-ah then an ni a, Group pakhat a awm te hi an inkhelh kual theuh hnuah point hmu sang pahnih ve ve ten Semi Final an lut dawn a ni.

MLA Cup 2022-a Champion team hian lawmman-ah pawisafai cheng nuai khat bakah Trophy leh Medal an dawng dawn a, pahnihna in Rs. 50,000/- bakah Trophy leh Medal an dawng dawn bawk a. Semi Finalists Team pahnih ten Rs. 5000/- ve ve an dawn dawn bakah Fair Play Awards Rs. 5000/- siam a ni bawk. Mimal chawimawina pawh siam niin Best Player in Rs. 1500 leh Trophy an dawn dawn bakah Top Scorer in Rs. 1500 leh Trophy an dawng bawk anga, Serchhip District-a Football Tournament-a lawmman semchhuah tam ber pawl a ni dawn a ni.

He Tournament-ah hian Group A-ah Serchhip P&E FC, Thenzawl Vengthar VC, Chhekhnai FC Serchhip, Thenzawl Kanan VC leh Neihloh VC te an awm a, Group B-ah Thenzawl East VC, Buangpui VC, Kanghmun VC, Malsawm Suzuki Vengchung Team Serchhip leh Thenzawl West VC te an awm bawk a. Inkhel hmasa ber hi October ni 3, 2022 (Thawhlehni)-ah khelh tur a ni dawn a, chhun dar 12:30-ah Serchhip P&E FC leh Thenzawl Vengthar VC te inhmachhawnin chawhnu dar 2:30-ah Chhekhnai FC leh Thenzawl Kanan VC te an inhmachhawn dawn bawk a. October 17 khian Final khela zawhfel tura ruahman a ni bawk.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »