Nakum-ah Pre-Paid Smart Meter hman tir vek tum

Nakum December thla-ah Mizoram-a Electric Consumer te chu Pre-Paid Smart Meter hman tir vek tum a ni.

Power & Electricity Department, Mizoram chuan Sawrkar Laipui hmalakna in Revamped Distribution Sector Scheme hnuaiah Consumer Meter zawng zawngte Pre­paid Smart Meter-a thlak vek turin hma a la tan ta a, sanction pawh Department chuan hmu tawhin December, 2023-ah chuan Pre-Paid Smart Meter hi hman vek tum a ni tih thuchhuah siamin an tarlang a. Pre-Paid Smart Meter hian Communication atan Wireless a hman dawn avangin Meter dahnate hmun ualau deuh a ngai tawh dawn a, hmun biru leh signal hmuh that theih lohnaa Meter dahnate chu hmun ualau zawka dah a tul dawn avangin Department hmalakna tha taka lo tawiawm turin P&E Department chuan mipuite an ngen a. Post-Paid atanga Pre-Paid-ah insawn a ngaih dawn avangin nakinah harsatna kan tawh loh nan Electric Bill ba te lo pe fel zel turin leh contracted load te pawh eng kan chhit tam lai ber ang mila lo in update turin an ngen bakah Pre-Paid Smart Meter hi hlawhtling taka hman a nih theih nan Power & Electricity Department chuan hriattirna chi hrang hrangte la tihchhuah an tum thu pawh an tarlang bawk a ni.