Sazu puang in District 8 tibuai

Mizoram-a Sazu puang chuan District 8 te nghawngin khaw 104-a loneitute thlawhhma ram hectare 524.31 zetah Buh hmun a khawih chhiat tawh thu Agriculture Department hotute’n an sawi.

Agriculture Department Director James Lalsiamliana’n AIR Aizawl a hrilh danin Sazu hian Aizawl, Lunglei, Siaha, Kolasib, Serchhip, Mamit, Saitual leh Hnahthial District-ah te an buh leh thlai dang tichhia-in a che tih report an dawng a. Champhai, Lawngtlai leh Khawzawl District atangte chuan Sazu puang report an dawng rih lo niin a sawi.

Mamit District-ah thlawhhma a khawih chhe zau bera hectare 225.7 zet a khawihchhia a, a dawtah Lunglei District-ah hectare 198 leh Aizawl District-ah hectare 18.5 a tichhe bawk a. Siaha Sistrict-ah chuan khaw pakhata thlawhhma hectare 3 chauh a khawih thung.

Sazu rualin buhvui a tihchhiat dan hi za zela 0.5 atanga za zela 10 vel a la ni a. Lunglei District-a Mualthuam North leh Mamit District-a Tuirum khuaah chuan chhungkaw pakhat ve ve thlawhhma chu a seh zo vek thung. Agriculture Department hnathawkte hian thla hlui atang khan Sazu Tûr semin Sazu puang thunun dan turte loneitute an zirtir tawh a, hei hi District tina kalpui a ni tawh a ni.

Comments

Popular posts from this blog

Tukverh-a tlasual boral