Kum 2025 ralhmaa Mizoram atanga TB natna umbo tura hmalakna tur Larsap in a hawng

Kum 2025 ralhmaa Mizoram atanga Tuberculosis (TB) natna umbo tura hmalakna tur, ‘State wide adoption of Pradhan Mantri TB Mukt Bharat Ahiyan’ chu nimin khan Mizoram Governor Hari Babu Kambhampati chuan hawngin, kum 5 chhungin Mizoram-ah TB natna umbo a nih theih a rin thu a sawi.

Raj Bhavan Durbar Hall-a ‘State wide adoption of Pradhan Mantri TB Mukt Bharat Ahiyan’ hawnna hunah hian kum 5 chhungin Mizoram-ah TB natna umbo a nih theih a rin thu Governor Hari Babu Kambhampati chuan sawiin, he beihrual-ah hian Sawrkar, NGO te, Kohhran te leh khua leh tui zawng zawngte kan inlungrual a, tha taka kan thawhho erawh a pawimawh takzet dawn tih a sawi a. TB natna chungchangah inzirtirna uar taka kalpui te, he natna vei te thinrik mai lova ngaihsak nachang hriat a tulna te, he natna hi damdawi hmanga enkawl leh damdawi a thlawna dawn a nih chungchang te leh TB natna chu kai lo tura inven theih a nih chungchang te kan zavaia kan chian hle a ngai a ni tih a sawi bawk.

Governor chuan TB natna vei ten an damdawi eipui tura chawtha an mawhmawh te an hmuh theih nan mi tlawmngai leh in phal te an mamawh tih sawiin, TB natna vei te tana nutrition leina tura sum leh pai thawha rawn penchhuak turin ngenna a siam a. A bultan nan Governor hian TB vei mi 20 te tana nutrition leina tur kum khat (1) atan tumsak dawn tih a puang a. Health Minister Dr. R. Lalthangliana pawhin TB vei mi 10 te tan a tumsak dawn bawk a. Mizoram-ah TB vei inenkawl mek mi 1360 awmin, heng zingah a tam ber te hi mi harsa tak tak an nih avangin tanpuina an mamawh hle a. Tunah hian mi tlawmngai 22 te chuan website link : reports.nikshay.in/FormIO/DonorRegistration-ah inziaklutin TB vei te eitur tanpuina (Food Basket) atan thlatin mi pakhat tana Rs. 650 – Rs. 1000 chhutin an sum leh pai an thawh mek a ni.

He hunah hian Health Minister Dr. R. Lalthangliana chuan tanrual hi chakna a ni tih Hripui leng donaah a chiang tawh tih sawiin, khatiang bawk khan HIV/AIDS dona leh Cancer natna titlem tura Beihrual kawngah Sawrkar, Tlawmngai pawl te leh Kohhran ten theihtawp an chhuah tlang leh mek a. Tunah kum 5 chhunga Mizoram atanga TB Natna umbo tum a nih thu sawiin, “He thilah pawh hian kan tanrual a pawimawh hmasa ber a. Kan thawhhona a that a, kan inlungrual phawt chuan kan hlawhtling leh ngei dawn a ni,” a ti bawk.

TB natna umbo tura tehfung atan kum 2015 hman a nih thu leh kum 2015-a TB natna thihpui zat aia TB veia thi 80% in a tlem zawk hunah leh hemi kum thoa TB vei awm zat aia zaa 90-a TB vei an tlem zawk hunah hlawhtling anga chhiar kan nih tur thu Health Minister chuan sawiin, Mizoram-ah kum 2015 khan TB avangin mi 38 an thi a, he Statistics atanga chhut chuan kum 2025-ah chuan Mizoram-ah TB natna avanga nunna chan mi 4 aia tam an awm lohna tura hmalak a ngai a ni, a ti a. Kum 2015-ah TB vei mi 2145 hmuh-chhuah niin kum 2025-ah chuan Mizoram-ah TB vei mi 430 aia an awm tlem theih nan theihtawp kan chhuah a ngaih tel dawn thu a sawi bawk.

TB natna umbo turin Testing tam a tul thu leh hatan hian Central TB Division chuan Mizo-ram-a RD Block zawng zawnga bun turin Truenat Machine 26 mamawhna chu a pawmpui tawh tih a sawi a. Tunah hian TB case te uluk taka chhuizui leh a veite umzui an nih theih nan Central TB Division leh Mizoram sawrkar tangkawp chuan TB Test na, Culture & Drug Susceptibility Testing Laboratory (C&DST Lab), Falkawn-ah a buatsaih mek thu leh tuna kalpui mek – Guwahati a sample thawn a ngaih avanga harsatna te a tikiang dawn tih a sawi bawk.

He hunah hian Health Department Principal Secretary Esther Lal Ruatkimi chuan he hmalakna an kalpui tur chungchang hi a sawifiah bawk a ni.