MDM hnuaiah Chaw ei thleng leh bungraw dang a nih tur ang aia Quality chhia supply a ni - MPCC

MPCC chuan Primary School leh Middle School (Elementary stage) naupangten a thlawna chaw chhun an dawn thin Mid Day Meal Scheme hnuaia chaw ei thleng leh bungraw dang supply te chu a nih tur ang aia quality chhia a nih avangin District Project Coordinator Office-te chuan School-ah an sem chhuak ngam lo, an ti. 

Nimin-a thuchhuah an siamah Mizoram Pradesh Congress Committee (MPCC) chuan Mizoram sawrkar hnuaia Elementary School hrang hrang tan Mid Day Meal Scheme hnuaiah Chawei thleng, Fianpui leh Dekchi liante tunhnaiah supply a nih thu tarlangin, hemi chungchang ah hian thil fello lian tak a awm nia an hriat thu an tarlang a. Heng bungraw hrang hrangte hi semchhuah mai theih turin District hrang hrangah thawn kual a nih thu tarlangin, “Heng bungraw hrang hrangte hi semchhuah mai theih turin District hrang hrangah thawn kual niin, zirlai naupang chaw chhun eina tur bungruate hi a nih tur ang aia te leh quality chhia a nih avangin District Project Coordinator Office-te chuan School-ah an sem chhuak ngam lo a ni,” an ti.

Mid Day Meal Scheme hmanga zirlai naupangten a thlawna chaw chhun an ei theihna tur leh zel sum siam nana hmanga a nih ang tur ni lo bungrua supply a ni chu MPCC chuan pawi an tih thu leh tha lo an tih takzet thu pawh an thuchhuah ah hian tarlangin, “Bungraw chhe tak supply tu hi NABARD loan hmanga School sak that hna tam tak thawktu, Education Minister thian hnai tak, a Consultancy Firm hman thiam Allied Concern a ni nghe nghe,” an ti.

Heng zirlai naupangte chaw chhun eina tur bungraw chhia leh a nih tur ang ni pha lote hi a rang thei ang bera bungraw dik leh tha zawka thlak thuai tur leh thil dik lo titute dan anga hrem ngei turin sawrkar an phut thu MPCC thuchhuah chuan an tarlan bakah he thil hi a tul ang a chhuifiah a, hma la turin sawrkar chu an phut bawk.