ZPM in sawifiah turin CM leh Minister te an phut

Zoram Peoples' Movement (ZPM) General Hqrs. hruaitute chuan Kolasib Fast Track Court building sakna tura lungphumna ah sawm zinga tel lo, Assam sawrkar hnuaia case nei lai Abu Mazumdar lo tel ve chu an chhuizui dawn thu an sawi a, hemi sawifiah tur hian tukthuan lo buatsaih saktu Supply Minister leh Kolasib bialtu MLA ni bawk K. Lalrinliana leh Chief Minister Zoramthanga te an phut thu an sawi bawk.

Nimin-a Kolasib Press Club-a thuthar thehdarhtute an kawmna ah ZPM General Hqrs. a PAC Member TBC. Lalvenchhunga chuan Kolasib Fast Track Court building thar sakna turah Assam-a Smuggling case nei lai Abu Mazumdar a tel ve ringawt chu an hriatthiam loh thu sawiin, State dangin case an awrh tir mek leh bail avanga chhuah lai khual tha thlena Minister In-ah lo thlen a ni chu a lungchhiatthlak tih a sawi a ni.

Building sakna tur lungphumnaah Abu Mazumdar tel ve chhan chu Fast Track Court lamah an zawhfiah thu leh anni hian an sawm loh thu an lo hrilh tih TBC. Lalvenchhunga chuan sawiin, “High Court lam atangin invitee zingah a tel lo tih a chiang,” a ti a. Abu Mazumdar hian Inrinni zingkar khan Supply Minister leh Kolasib bialtu MLA K. Lalrinliana In-ah tukthuan a ei ngei thu leh hei hi a lungchhiat thlak thu sawiin, “Abu Mazumdar hi Assam sawrkarin wanted tia treatment a pek, a hnua tlanbo zui ta a ni a, March 11 khan Dholai PS-ah in surrender a ni. Anticipatory bail la mahse a case dang pahnih vangin man zui a ni ta tho. Tunah hian bail-a chhuak a ni a, bail condition hi kan chhuizui a, Assam chhuahsan thei a ni em tih leh Mizoram rawn lut tura ILP hi tunge sponsor tihte hriat kan duh,” a ti bawk.

He hunah hian ZPM Vigilance Department changtu General Secretary SL. Ngursailova Sailo chuan Kolasib Fast Track Court lung-phum-a Technical Report leh Contract Agreement zat in ang lo te, Court Room kim lo leh Lift kim lo te chu an enzui dawn tih a sawi bawk.