Latest News

Faina-ah hmalakna kalpui

Image
Faina beihpui thlakna atana sawrkar laipuiin programme a duan, Swachhta Hi Seva hnuaiah Faina kawnga hmalakna kalpui mek a ni a, tunkar chhung zawng hian kawng hrang hranga hmalak dan tur duansa hmangin hmalak a ni ang. Nimin khan Serchhip District chhunga khaw hrang hrangah Swachhta Hi Seva hnuaiah hian hmalakna kalpui niin Serchhip-ah chuan khawpui chhunga hmalatu UD&PA Department bultumin khawchhunga vantlang inthiarna hmun tihfai hna thawh a ni a. Thingtlang bika hmalatu PHE Department Serchhip WATSAN Division te hmalaknain Khawlailung, Mualcheng leh East Lungdar-ah te pawh vantlang hmun tihfai hnatlangpui hi neiin hun an hmang bawk a ni.

COVID-19 Guidelines sut ta

Disaster Management Act tlawhchhana Mizoram-a COVID-19 inkaihhruaina hman mek chu thiah a ni ta.

Sawrkar laipui National Disaster Management Authority chuan India rampum ah COVID case a tlakhniam tak zel avang leh sawrkarin hrileng a hmachhawnna kawngah inbuatsaihna tha tawk a neih tak avangin March 22, 2022 khan DM Act hmanga inkaihhruaina tihchhuah zui a tul tawh lo tiin sutna order a lo tichhuak tawh a. Ministry of Home Affairs chuan February 25, 2022 hnu lamah inkaihhruaina thupek thar a tichhuak tawh lo a ni.

Sawrkar laipui hmalakna dung zuiin Dr. Renu Sharma, Chairman, State Executive Committee, State Disaster Management Authority chuan Mizoram chhunga COVID-19 hrileng dinhmun ngun taka thlira a zirchian hnuah case a lo tlakhniam tak zel avangin DM Act hmanga inkhuahkhirhna thupek tihchhuah thin chu sutin September 27, 2022 khan thupek a tichhuak a. Health & Family Welfare Department in CO-VID-19 hrileng dona atana thurawn a tihchhuah - Face mask hman leh kut silfai te erawh hman chhunzawm zel a ni ang.

Comments

Popular News (Last 30 Days)