Serchhip-ah MNF Party buatsaihin ‘Martar te ni’ urhsun taka hman a ni

MNF Party chuan nimin September 20 khan ‘Martar te Ni’ an hmang a, Serchhip-ah pawh MNF Adviser Lalruatkima hovin New Serchhip YMA Hall-ah he ni hi urhsun taka hman a ni.
Serchhip East Block MNF buatsaiha he ni hmanna ah hian MNF Adviser Lalruatkima chuan British awpna lak ata India in zalenna a hmuh dawna India leh a chhevel insing sak laiin Excluded Area-a awm kan ni a, chuti chungin India-a kan tlu lut ta a. District Council te niin UT-ah kan awm chho a. Kum 1966-ah hnam pasaltha ten zalenna famkim nei turin zalenna an sual ta a ni, a ti a. Thalai tam tak State pawna lehkhazir leh hnathawkte an haw khawm a, ram chhan turin an penchhuak tih sawiin, “Jet fighter hmangin bomb kan ni a, khaw tam tak a kang duai duai a, mahni khua kan tlansan a, nunau an chiau vawng vawng a. Kan In leh lo bakah chhek In thlengin an hal a nih kha. Mizote lo hi eng Hnam mah India hian Indo Thlawhna hmanga a beih an awm lo. Hnam huaisen kan nih avangin Indo thlawhna hial min beih nan an hmang a. Mi tam takin ram leh hnam tan an nunna hlu tak an hlan ta a ni,” a ti.


MNF Adviser Lalruatkima chuan Hnam pasalthate inpekna leh an hlutna, chawimawia chawisan an tul zia kan thinlung ah lo thar se a duh thu sawiin, thangthar te paawhin an hlutna kan hriat reng a pawimawh thu a sawi a, “He ram tan hian engnge kan tih ve theih, tih mahni inzawt ila, Martar te thisen ah inhlan thar ang u,” a ti a. Ram hrang hranga thendarh-a awm Mizote chu engtik ni ah emaw chuan rorelna pakhat hnuaiah zalenna famkim nen kan la awm leh a rin thu sawiin, chumi tur chuan kan tanrual zel a ngaih thu a sawi bawk.

He hunah hian Khual zahawm leh MNF General Hqrs. Adviser J. Malsawmzuala Vanchhawng chuan Pathian in Mizote Hnam ah min siamin ram min pek thu leh kan ram chin pawh fel tak min pek thu sawiin, kan pi leh pu ten lo satzau in a hnuah anmahni awptute atanga zalenna famkim an sual thu a sawi a, zalenna sual chhung hian mi tam tak ten nunna chanin, heng mite pual hian kum 1980 atangin 'Martar Day' hi hman a nih thu a sawi a. He ni ah hian Martar te ropui zia leh an inpekna hlut zia kan rilru ah thar se a duh thu sawiin, kan thinlung in kan chawimawi a tul thu leh Martar te tana kan tih theih sang ber chu kan Hnam lungphum min lo phum sak tawh tha taka vawnnun, chhawmnun leh chawimawi zel a ni tih a sawi a. Hemi atan hian thang leh thar ten mawhphurhna kan neiin theihtawp kan chhuah zel a tul thu a sawi bawk.


Martar te Ni puala inkhawm hi Serchhip East Block MNF President C. Vanlalsiamthara chuan kaihruaiin PAMRA Adviser Hmangaihzauva pawhin thu a sawi a, he hunah hian Martar te sunna hun hman niin chawhnu lamah Political Session neih chhunzawm nghal a ni bawk.

Comments

Popular posts from this blog

Volleyball S/F khel dawn