Serchhip Sailiamkawn Police Check Gate-ah a vawi khatna atan Dan lova Kuhvarah phurh man

Serchhip Sailiamkawn Police Check Post-a Duty te chuan nimin zing khawvar hma khan khawchhak lam atanga dan lova rawn phurh Kuhvarah ro bag 80 chu Motor pahnih atangin an man a, kumin February 17-a he Check Post hawn a nih hnua helai hmun dan lova phurh Kuhvarah man hmasak ber nia hriat a ni.
Serchhip Police te hnen atanga thu kan dawn danin heng kuhvarah ro te hi 407 Truck pahnih hmanga rawn phurh niin nizan hmasa zanlai pelh hnu dar 1:30 vel khan Sailiamkawn-a Police Check Gate hi an paltlang dawn laiin Police duty te chuan lo enfiahin heng Kuvarah ro te hi man a ni a, Kuhvarah ro hi a vaiin bag 80 niin Motor pahnih ah hian bag 40 ve ve-a phurh a ni a, a vaiin Kg. 3200 ve ve anga chhut niin Rs. 1,92,000/- hu nia chhut niin kg. khat Rs. 60/- man ni tura ngaih a ni. Serchhip Police te chuan heng Kuhvarah te hi Vaphai atanga rawn phurh a nih thu sawiin, Dungtlang Police Check Post helin Samthang leh Khawbung inkar-ah rawn kalpui a ni a, niminpiah tlai khan Vaphai atang hian rawn chhuakin Vairengte-a dah tur a nih thu Motor khalhtute chuan an sawi a ni.


Heng Motor khalhtute hian an Kuhvarah ro te hi Vaphai khuaa Lalthakimi te a nih thu sawiin, tunhnaia Myanmar atanga rawn lut a nih loh thu leh Mizoram-a Kuhvarah tawlh a hluar laia rawn lut tawh, a hnua Kuhvarah tawlh khuahkhirh nasat a nih tak avanga tangkhang a nih thu an sawi a, hetianga hun rei tak lo dah tawh a nih avang hian Kuhvarah te pawh hi chhe tak tak a ni tih an sawi bawk a ni. Heng Kuhvarah phurhna atana Motor hman pakhat Mz-04A/1249 hi kuhvarah neitu nia an sawi Lalthakimi ta nia sawiin, a khalhtu Chungneihluai (23), Vaphai khua leh a Handyman te pawh thu zawhfiah tura lak nghal an ni a, Motor pakhat zawk Mz-04A/4611 hi Vaphai khua nia insawi bawk Robert Lalchungliana (37) ta leh ama khalh niin a Handyman nen lak nghal an ni bawk a, Serchhip Police te chuan tihtur tul ang ang an tihfel hnuah Lunglei-a Custom Preventive Force ten a tul anga hma an lak zui turin nimin vek khan Lunglei-ah hian thawn nghal a ni.

Central YMA chuan Mizoram kaltlanga Kuhvarah tawlhruk venna tur Checkgate siam tura Chief Minister Zoramthanga leh sawrkar hotute dangte an ngen hnuah Serchhip Sailiamkawn leh Sairang-ah te hian Check Post siamin Sailiamkawn Checkgate hi February 17, 2022-ah hawn a ni a, helai hmunah hian nileng zankhua-a Police Duty indah niin lirthei kal te enfiah thin a ni a, dan phalloh thil phurh hrang hrangte man ni tawhin Kuhvarah bik hi tun tum hi an man hmasak ber a nih thu Serchhip Police te chuan an sawi a ni.

Comments

Popular posts from this blog

Volleyball S/F khel dawn