Mizoram in Agriculture lama hma a lakna hrang hrang in Central lam beng a verh - Agriculture Minister

Agriculture Minister C. Lalrinsanga chuan Mizoram sawrkarin Agriculture lama hma a lakna hrang hrangah Scientific Approach kan neih dan leh kan kalpui dan in Central lam beng a verh ti sawiin, hengte hi Mizoram in Agriculture-a ‘Outstanding North East State Award’ a dawn theihna kawnga kawngro sutu pawimawh tak a ni, a ti.

Tun thla ni 14-a New Delhi-a ‘Outlook AgriTech Summit & Swaraj Awards 2022’ ah Mizoram in ‘Agriculture-a Outstanding North East State Award’ a dawn avanga All Mizoram Farmers Union (AMFU) hruaituten lawmpuina hun nimin-a Agriculture Minister Pisa-a an hman ah Agriculture Minister C. Lalrinsanga chuan Mizoram in he chawimawina a dawn chungchang hi a sawi a. Agriculture Minister chuan Mizoram chu kum 2021 Good Governance Index-ah pawh Hill State Category hnuaiah Agriculture and Allied Sector-ah pakhatna kan lo ni tawh tih sawiin, “Tun tuma Outlook -Swaraj Award pawh hi India rampum huap mithiam tak tak awmna Jury ten an thlan niin Mizoram chu CSS kan implement danah te, Agriculture Technology hman that kawngah te, Farm mechanization kan kalpui chho danah te, Capacity Building kan kalpui danah te, COVID-19 hri leng kara Farming lama mipui kan kaihhruai dan bakah Mizoram mipui nawlpuiin farming kan tui dan te leh thil dang tam tak hmanga endik kan nih hnuah Outlook Swaraj Award 2022 for Outstanding Northeast State in Agriculture hi min pe a ni,” a ti a. “He Award hi keimah vang bika la kan ni lova, Secretary leh Department-a thawktute leh kan loneitute thawhrim rah a ni a, Zoram mipuite tanrualna rah a ni bawk. Hetianga thawktu hrang hrangte thawhrimna zarah hian a hmawr bawktu ah Minister leh Agriculture Development Board Vice Chairman chu kan awm mai zawk a ni,” a ti.

Agriculture Minister chuan Agriculture Sector-ah hian hmabak kan la ngah hle tih pawh sawiin, “Tuna a tam zawkin kan innghahna chu Tlangram Lo neih a ni. Kan Lo halin Medicinal Plants a tihchhiat nasat dan te, pollution a thlen nasat dante kan chhut a ngai a. Kan awmna hi kan tu leh fa lo awm zel tur te tana awmna tlaka kan siam a ngai. Ram tichereu lo zawnga hmalak a tul hle a, chumi tur chuan Sawrkarin Integrated Farming System pawh kan kalpui tan mek a. Chumi ang chuan awmze nei takin Ramngaw, Thlai, Ranvulh leh Sangha dil kalpui kan tum a ni,” a ti bawk.

Alu Chi siam dan thar hmangin, Aero-ponic Technology hmangin boruak ah Alu chi siam tumin hma an lak mek thu leh India rama thawndarh thei tura hmalak an tum thu Agriculture Minister chuan a sawi a, “OP-12 Bio-Fertilizer kan kalpui tur hian min tilawm hle a. Hemi hmang hian kum 2023 atang chuan ramngaw thiata Lo vah ti tlem a, Chul rit a, hlawk zawka thlai thar dan kawng a inhawng chho thei turah kan ngai a. Chumi hunah chuan, Patling in ipte puiah ramchang kan ak tawh dawn tihna a ni,” a ti a. “Pu Zoramthanga kaihhruai Mizoram sawrkar in Agriculture lama kan hmalakna hrang hrangah, Scientific Approach kan neih dan leh kan kalpui dante hian Central lam beng a verh a, hengte hi Award kan dawn theihna kawnga kawngro sutu pawimawh tak a ni,” a ti bawk.

Agriculture Minister chawimawina hunah hian AMFU President Chhuanvawra chuan CO-VID-19 hrileng avangin duh angin loneituten hna an thawk thei lova, Lockdown leh a kaihhawih avangin sawrkar tan pawh chet a har em em a. Heti chung chung hian Mizoram chuan Agriculture-ah North East State te zinga a titha ber chawimawina kan dawng chu a lawmawm dan a thuk bik em em tih a sawi a. Mizoram in he Award kan dawn theihna tura chawimawi phu ber ni a an ngaih Agriculture Minister C. Lalrinsanga chu chawimawina thuziak an hlan nghal bawk a ni.