District 2-ah RTI Act chungchang zirhona nei

Nimin khan Lunglei leh Siaha District-ah State Public Information Officer (SPIO) leh State Assistant Public Information Officer (SA-PIO) te tan RTI Act chungchang zirhona neih a ni.

Convention Centre, Lunglei a RTI Act zirhona hun hi Mizoram Information Commission-a Chief Information Commissioner Lalnunmawia Chuaungo IAS (Rtd) chuan hmanpuiin mipuite rorelna sawrkar (Democracy) leh RTI chu thil kal kawp tlat a ni tih a sawi a. Sawrkar hmalakna leh hnathawhte hriat chu khua leh tuite chanvo a ni tih sawiin, RTI Act hi ramchhung State dangte aiin Mizoram-ah kan la hmang tlem hle a, he dan chungchang hi mipuite zingah inhrilhfiah a tul takzet a, a tangkai tur anga mipuiten an chhawr thiam theih nan inzirtirna chak tak kalpui chhoh zel a tul a ni, a ti. CIC chuan Suo Moto Disclosure under Section 4 ngaih pawimawh a tul thu sawiin, Department website-ah te Department hmalakna hrang hrang te mipui hmuh theih tura chhawpchhuak thin turin a chah bawk. 

Siaha-ah pawh nimin khan I&PR Conference Hall-ah State Public Information Officer (SPIO) leh State Assistant Public Information Officer (SAPIO) te tan ni 2 awh tur RTI Act, 2005 chungchang zirhona neih tan a ni a, Administrative Training Institute (ATI), Aizawl leh DC Office, Siaha te tangkawp in an buatsaih he Training hi Siaha DC Lalsangliana chuan hawngin RTI Act in a tum ber chu Information hriat theihna chanvo (Right to Information) hmanga India Khua leh tui te tih chak a, langtlang taka sawrkar kaltir te, eirukna khuahkhirh te leh sawrkar hmalakna reng reng mipui ten an hriat ve theih nana kawng hawn sak a ni, a ti a. Online hmanga RTI hi hman theih a nih tawh avangin SPIO leh SAPIO ten RTI Act-2005 hi an hriatchiana, an fimkhur hle a ngai tih a sawi bawk.