Latest News

Sailiamkawn atanga Hriangtlang panna kawng laih thar Addl. DC leh SDO (Sadar) ten an tlawh

Serchhip leh Hriangtlang inkar kawng chhuat tlabal helna tura kawng laih thar chu nimin khan Serchhip Addl. DC Lalmuansanga Ralte leh SDO (Sadar) Lalzikpuii te chuan tlawhin he kawng laih a nih theihna tura thawktute leh kawng laih hna thawktute chungah lawmthu an sawi.
Hriangtlang kawng laih thar a tlawhna ah hian Serchhip Addl. DC chuan Serchhip Sailiamkawn atanga Hriangtlang panna kawng hi a hnuaia NH. 54 Serchhip by-pass road laih a nih avangin nikum December thla khan a lo min tawh thu sawiin, amaherawh chu kawng awmsa chu zauh hlekin kawng pangngai hi hman leh a ni tih a sawi a. Hemi hnu kumin April thla khan kawng chhuat hi tlabal ta vekin kawng hi zawh zui ngaihna a awm tak loh thu sawiin, Hriangtlang a kal tur tan pawh Dawngzawl lamah kual taka hel zel a ngaih tak thu a sawi a. He kawng siamthat a nih theih nan hian sawrkar, YMA leh tlawmngai pawl hrang hrang leh Hriangtlang leh Serchhip lama VC te chuan theihtawp chhuaha hma an lak thu sawiin, Hriangtlang bialtu MLA leh Home Minister Lalchamliana pawhin a theih anga hma lain tunah chuan lirthei kaltlang theih tura laih zawh a ni ta chu lawmawm a tih thu a sawi a. He kawng laih a nih theih nana thawktu hrang hrangte leh kawng laih hna thawktu NHIDCL leh an hnuaia Contractor te chungah pawh an lawm hle tih a sawi a ni.


Addl. DC Lalmuansanga Ralte chuan he kawng chhia avanga mipui ten harsatna an tawh laia sum leh pai-a hlawkna ngawt ngaihtuah lova ram petute chungah an lawm hle tih a sawi a, he kawng laih thar pawh hi a tha hle nia a hriat thu sawiin, he kawng hian NH. 54 by-pass chu a pawh nghal dawn avangin Hriangtlang mipuite tan pawh awlsamna nasa zawk a siam a beisei thu a sawi bawk a ni. Hriangtlang kawng laih thar hi PMGSY kawng a nih nghal tur thu Addl. DC chuan sawiin, sawrkar lamah pawh tihfel ngai ang ang te tifelin, Company lamin a kawng laih an zawh hnu hi chuan thildang buaipui ngai te chu buaipui zui a nih tur thu a sawi a ni.

Serchhip Addl. DC leh SDO (Sadar) te hi kawng laih hna thawktu KRAM Infracon Pvt. Ltd. atangin Human Resource Officer Prem Singh leh Deputy General Manager Devender Kumar Verma bakah an thawhpui ten an lo dawngsawng a, he kawng laih thar hi Sailiamkawn atanga pengin kawng hlui zawh tawh lovin NH. 54 Serchhip by-pass road chu a zawh nghal tawh dawn a, meter 800-a thui NH. 54 hi a zawh hnuah pengin meter 500-a thui kawng laih hian Sakhisih ngaw thlenhma deuhin Hriangtlang kawng hlui chu a pawh leh dawn a, he kawng laih thar leh kawng hlui infinna atanga Sailiamkawn thlenga kawng awm sa, KM khat aia thui mah chu paih a ni dawn ta a ni.

Comments

Popular News (Last 30 Days)