Grape Wine zawrh phalna dil an la awm lo

Mizoram sawrkar chuan kuthnathawktute Grape tharchhuah Wine zawrh phalna ‘gazette’ a tichhuak tawh a, hetihlai hian zawrh phalna dil erawh an la awm lo.

Thudawn danin Printing & Stationery Department chuan kar kalta khan Wine zawrh phalna gazette hi an chhuah a. Ruahman dan chuan grape wine zuar duhte chuan Excise & Narcotics Department-ah permit an dil a ngai dawn a. Zirtawpni kalta thleng khan permit dil hi an la awm lo nia thudawn a ni.

Hnahlan Grape Growers & Processing Cooperative Society hruaitute chuan Winery atanga Isabella an siam chu an la hralh chhuak hrih lo niin an sawi a. “A tam tham ang chuan kan la hralh chhuak lo a; mahse, sawrkar department leh tute hnenah emaw chuan tlem tete chu kan hralh tawh a ni,” an ti. Champhai Grape Growers Society hruaitute chuan Champwine chu an hralh deuh reng tih sawiin, “Aizawl, Serchhip leh Lunglei-ah te zawrh turin kan pe chhuak a, a zuartute atangin harsatna an tawh awm kan hre lem lo,” an ti a. October 12, 2022 hian Wine Rules sawrkarin a siam lawm an tum tih an sawi bawk.