Mizoram DGP in Govt. Serchhip College leh Serchhip Police Station te a tlawh

Serchhip-a rawn zin Director General of Police (DGP) Mizoram Divesh Chandra Srivastva chuan Inrinni khan Govt. Serchhip College tlawhin Serchhip Police Station tual-a Waiting Shed leh Police Station chhunga Guest Room siam thar te chu a hawng bawk.

Zan khat riaka rawn kal Mizoram DGP hian Inrinni chawhma lam khan Govt. Serchhip College tlawhin Govt. Serchhip College Principal leh a thawhpui ten lo dawngsawngin NCC ten Guard of Honour an pek hnuah Career Guidance & Counselling Cell leh NCC (Army & Air Wing) tangkawp ten Programme an buatsaih ah Resource Person niin hun a hmanpui a, DGP chuan zirlai naupangte chu an hma hunah eng kawng pawh zawh dawn se a sang ber nih zel tum turin a chah a, chumi atan chuan taimakna, tumruhna, insumtheihna leh thuawihna te a pawimawh a ni, a ti. Mizote khawtlang huapa kan in enkawl dan chu a tha hle tih sawiin, Aia upa zawk te, nu leh pa, khawtlang hruaitute leh Kohhran lama thil tha kan inzirtir thin te hi nghet taka vawn tlat a pawimawh hle a ni, a ti a. Hlawhtling tur chuan hriselna ngaih pawimawh pawh a tul hle tih hre tura zirlaite chu chahinn, “Taksa tichhe thei laka inthiarfihlim turin ka ngen che u a ni,” a ti.


DGP chuan tunlai khawvel changkang zelah Social Media bawih-a tang lo turin zirlaite chu a fuih a, a tha zawng chauhva hmang a, an zirlai puitu atan chauh a hmang thin turin a chah bawk. Govt. Serchhip College NCC ten Guard of Honour tha taka an lo pe thei chuan a ti lawm hle tih sawiin, Uniform ha chi Programme lama inhmang tam turin zirlai kalkhawm te chah a. “Force mite chu Uniform nei an nih angin an Uniform chuan an zahawmna a keng tel a, anmahni vawngtu a ni,” tiin NCC Programe a inhmang zel turin zirlai kalkhawmte a sawm a ni.

DGP hova hun hman hi Dr. Lalrinchhani, Asst. Professor chuan kaihhruaiin Serchhip SP Stephen Lalrinawma chuan inhmelhriattirna leh inlawmna hun a hmang a, Govt. Serchhip College Principal K. Laldinpuii chuan lawmthu sawiin hun a khar a ni.


Govt. Serchhip College-a hun a hman zawh hnu hian DGP hian Serchhip Police Station tlawhin Police Station tual-a Waiting Shed leh Police Station chhunga Guest Room an siam thar chu a hawng a. Serchhip Police Station-a Officer Incharge SI C. Lalremthanga kaihhruai-a hun hman ah DGP chuan Serchhip-a a cham chhungin Police ten phur takin hna an thawk tih a hmu tih a sawi a, Serchhip Police Station tha takin an enkawl tih a hmuh thu sawiin, thawktute chungah lawmthu a sawi bawk. 


Mizoram Police in ruihhlo man tam lama World Record an siamna kawngah Serchhip Police te an thawk hlawk hle tih DGP chuan sawiin, lawmthu a hrilh a, Mizoram hmun hrang hranga Police te thawhhona that vang a ni, a ti bawk. Pawikhawihna thubuai hrang hrang zingah rukruk thubuai chu enzui uluk ngai bik anih thu sawiin, Patrolling pawh uluk zawka neih a pawimawh thu a sawi a, Police te hnathawh kawnga a ngaih pawimawh hrang hrangte sawiin Police te chu a fuih bawk.

Serchhip Police Station a hun a hman zawh hnu Inrinni chawhnu khan DGP hian Serchhip chhuahsanin Aizawl a pan leh a ni.

Comments

Popular posts from this blog

Volleyball S/F khel dawn