Vawiin-ah Hmeichhe Football Semi Final khelh a ni dawn

Serchhip District Football Association (SDFA) buatsaih Women Football Championship khelh mek chu Vawiin hian Semi Final khelh a ni dawn. Serchhip Sports Stadium-a SDFA Women Football Championship khelh mekah hian Inrinni khan Group Match khelh zawh a ni a, inkhel hmasa berah Group B atangin Group Stage paltlang zo lo P&E FC leh Chhingchhip Mualpui GSA te inhmachhawnin P&E Veng FC hian Naom Lalhruaizeli goal khung hmangin si khat faiin hnehna an chang a, inkhel vawi hnihna ah Group B atanga Semi Final lut tawh Hmar Veng FC leh Thenzawl Zone inhmachhawnin Hmar Veng FC hian Lallawmawmi gola khung hmangin si khat faiin hnehna an chang bawk a. an Group atang hian khelh 3-ah point 9 hmutu Hmar Veng FC hi Group Winner niin point 6 hmutu Thenzawl Zone hi pahnihna an ni a, point 3 hmu P&E FC leh point hmu lo Chhingchhip Mualpui GSA te an tla a ni.

Inrinni-a inkhel hnuhnung berah Group A atangin Dinthar FC leh Vengchung FC te inhmachhawnin Vengchung FC hian 2-1 in hnehna an chang a, Dinthar FC hian Lalrinngheti hmangin goal khung hmasa mah se Vengchung FC tan Malsawmkimi leh Lalnuntluangi ten goal khungin an lehthal a, heti hian match hnih atanga point 6 hmutu Vengchung FC hi Group A Winner niin Dinthar FC leh Chanmari FC ten point khat ve ve hmuin GD tha zawk Dinthar FC hi pahnihna niin Semi Final an lut a ni.

He Championship hi Vawiin ah Semi Final khelh a ni dawn a, chawhnu dar 1:30-ah Vengchung FC leh Thenzawl Zone an inhmachhawn anga, tlai dar 3:00-ah Hmar Veng FC leh Dinthar FC te an inhmachhawn ve leh dawn bawk ang. Semi Final Match atang hian minute 60 (30+30) khelh a ni tawh dawn a, hun pangngaia chak zawk an awm loh chuan Extra Time (7+7) khelh a ni tawh dawn bawk a ni.