Governor in Serchhip rawn tlawh mekin Sawrkar Department hrang hrang hotute a kawm

Mizoram Governor Hari Babu Kambhampati leh Lady Governor Jayasree Kambhampati te chuan zan khat riakin Serchhip an rawn tlawh mek a, nimin khan Sawrkar Department hotute kawmin, Project thenkhatte thawh chhung a rei lutuk thin leh a thawh hun chhung pawhsei a ni fo thin chu thil fel lo tak a ni, a ti.

Governor Hari Babu Kambhampati hian nimin chawhnu khan Serchhip DC Conference Hall-ah Serchhip-a sawrkar Department hotute kawmin Serchhip DIPRO K. Saitluanga kaihhruai he hunah hian Governor chuan Project thenkhatte thawh chhung a rei lutuk thin leh a thawh hun chhung pawhsei a ni fo thin chu thil fel lo tak a ni, a ti a. Project thenkhat thawhchhung rei lutuk hian project thar thawh tur awm thei te a dang bet thin a, mipui tana hmasawnna ruhrel tha tak tak tur te kan chan phah thei a ni, a ti. Mizoram hmun hrang hranga District mipui tam zawk ten Central Welfare Scheme tha tak tak, kum khat atan cheng tlemte pe-a cheng nuai tel ruh theihna tur te an hre lo hle tih a hmuh thu leh pawi a tih thu sawiin, heng ah te hian zirtirna kalpui nasat a tul thu a sawi a. Banker te chuan Scheme tha tak tak beneficiary te hrilhhriat chu an mawhphurhna a ni tih sawiin, “Vanduaina emaw, chhiat tawh thulh a Rs. 2,00,000/- vel tak theihna, kumtin Rs. 15 Bank a deposit duh mi tam tak an awm ka ring a, mi tam tak chuan an hriatloh vangin heng Scheme te hi an ti lo a ni,” a ti.

PM Ujjwala Yojana (PMUY) Scheme-a Gas Connection neih theih chungchang hria an tlem leh diltu an tlem te chu mipuiin an hmelhriat that tawk loh vang a ni tih Governor chuan sawiin, Gas Distributor te leh sawrkar official te an tan a ngai hle a ni, a ti a. Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana (PMJJBY) leh a dangte chu mipui ten an hriat a ngai tih a sawi bawk.

Education-ah Serchhip District leh District dang pahnih tan lak zual a ngaih thu leh Mizoram pum ang pawhin tan lak a ngai hle tih pawh Governor chuan sawiin, PGI rating-ah Mizoram dinhmun siam that a nih theih nan DEO ten Headmaster te leh School head te zirtirna an pe tha hle tur a ni, a ti a. Sawrkar hnathawk te, Banker te, Gas Distributor leh mipui rawngbawlnaa mawhphurtute chu pro-active an ni tur a ni a, zawh kher ngai lovin mipui tana hamthatna an kuta awm te chu an lo hrilh zung zung zel tur a ni a, hei hi an mawhphurhna a ni, a ti.

Governor chuan Serchhip District chu District ralmuang ber nia a hriat thu a sawi a. Kawng thenkhatah hmalakna tha tak tak te hmuh turin awmin National Award for Best Panchayat te pawh Sialsir in a lo dawng tawh a. Heng bakah hian Faina kawngah Serchhip District in hma an la tha hle nia a hriat thu a sawi bawk.

He hunah hian Bawrhsap Nazuk Kumar chuan Serchhip District dinhmun tlangpui tarlangin, Serchhip District hi sq.Km 1421.6-a zau niin mihring 80,000 vel an cheng mek a. Village Council 54 awmin, Civil Sub Division 3, RD Block 2 leh Assembly Constituency 3 a awm a. Serchhip District chhunga hmalakna lian NH-54 siam hna te, Myanmar Refugee chungchang te, Jal Jeevan Mission leh a dang te tarlangin, Baktawng khua in Furniture leh bungbel siam hna an thawh te, Thenzawl in Puantah lama hma an lakna te, N.Vanlaiphai lama Theitui siamna leh Serchhip-a Zikhlum leh thlai dang tharchhuah chungchang te paawh a sawilang bawk a ni.

Serchhip SP Stephen Lalrinawma hnen atangin Security Scenario of Serchhip District report ngaihthlak ni bawkin Police, Excise leh mipuite thawhhona tha tak avangin Serchhip District-ah buaina liantham thleng a awm lova. Dan phalloh tawlhruk man erawh a awm zeuh thin a. Tunah hian Serchhip District Police-ah hian personnel 153 awm turah Police personnel 110 an awm mek a ni.