Serchhip-a Horticulture Department ten SEDP hnuaiah tanpuina sum an pechhuak tan

Serchhip-a District Horticulture Office chuan nimin atang khan an Department hnuaia Family Oriented SEDP kaltlanga tanpuina dawng turte hnenah sum an pechhuak tan.

Mizoram sawrkar Flagship Programme, SEDP hnuaia Family Oriented SEDP kalpui mek ah Serchhip-a Horticulture Department chuan nimin atang khan an Department hnuaia beneficiary te hnenah tanpuina thawhkhatna (1st instalment) Rs. 25,000/- chu an semchhuak tan a, tanpuina hi Bank Account kaltlanga pekchhuah niin an Department hnuaia beneficiary te hi October 2022 chhunga pek zawh hman an inbeisei thu Serchhip DHO R. Lalnuntluanga chuan LENKAWL a hrilh a ni. Hemi hmalam tun thla ni 21 khan Land Resources, Soil & Water Conservation Department chuan an Department hnuaiah tanpuina dawng turte chu an Account-ah sum an lo thun sak tawh a ni.

SEDP Line Department dang te pawhin tanpuina semchhuak tur hian hma an la mek tih an sawi a, Serchhip District-a Beneficiaries ngah ber AH & Vety Department chuan sum an pechhuak thei tep tih sawiin, karleh lamah chuan pekchhuah tan theih an inbeisei thu an sawi a. Commerce & Industry Department pawhin an tifel tep tih sawiin, karleh lamah chuan an pekchhuah theih an inbeisei thu an sawi a, Agriculture Department pawhin an inpeihfel tawh thu sawiin, DC Office atanga sum pekchhuah phalna an hmuh veleh pekchhuah nghal theih a nih thu sawiin, karleh ah chuan an pekchhuah theih ngei an beisei thu an sawi a ni.

UD&PA Department chuan tunah hian an Account-ah tanpuina sum hi a awm tawh thu sawiin, amaherawh chu tunhnaiah Serchhip DUDO sawnchhuah a nih avangin an semchhuah theih hun tur an la hriat loh thu an sawi a, tunkar-ah DUDO mawhphurhna la tur tihfel a nih chuan karleh lamah pawh semchhuah theih mai an inrin thu an sawi a. Sericulture Department pawhin an Department hnuaia beneficiary te kokhawmin an Account te enfel sak an nih tawh thu leh DC-ah thehlutin hemi hnu hian sum hi an semchhuah theih hun tur a hriat tur thu an sawi a. Fisheries Department pawhin Vawiin lam hian Account-a thun tura an buatsaih tan theih tawh tur thu an sawi bawk.