Serchhip-ah 'World Day of The Deaf' pualin Beng enkawl that pawimawh zia inzirtirna neih a ni

September thla Pathianni hnuhnung bera hman thin 'World Day of The Deaf' pualin nimin khan DIET Serchhip-ah hun hman a ni a, beng enkawl that a pawimawh zia inzirtirna neih a nih bakah a thlawna Beng leh ri hriatna enfiahna hun hman nghal a ni bawk.

'World Day of The Deaf' puala inkhawm Serchhip DIET Conference Hall-a neih hi Dr. Joseph Lalmuanpuia Hauzel, District Nodal Officer, NPPCD chuan kaihruaiin he hun hmanpuitu Serchhip District Medical Superintendent Dr. ZD. Lalmuanawma chuan Ri hriatna thalo hi kan khawtlang ah ngei pawh an tam thu leh an hnen atanga 'Rualbanlo Certificate' dil zingah pawh Beng leh ri hriatna lama harsatna nei chu a tam ber pawl an nih thu a sawi a. Ri hriatna lama harsatna neih chu thihpui hial khawp natna ni lo mah se kan khawsak hona ah heng mite hian inkiltawihna leh nuam tih lohna tam tak an neih thin thu sawiin, hei vang hian ri hriatna lama harsatna nei te hi nuam ti taka kan zinga an khawsak theihna turin theihtawp kan chhuah a tul thu a sawi bawk a ni.


He hunah hian National Programme for the Prevention & Control of Deafness (NPPCD) Serchhip District atangin PC. Lalbiakzuali chuan an hmalak dan leh hna an thawh dan te tarlangin, kum 2014 atangin Mizoram-ah NPPCD hi kalpui tan a nih thu leh Serchhip-ah pawh kum 2017 atanga kalpuiin Mizoram-a District 9-ah kalpui mek a nih thu a sawi a. Beng enna khawl pahnih (2) neiin ri hriatna lama harsatna nei leh Beng chhung en ngai te tan khawl hmanga an en theih reng thu a sawi. Ri hriatna thalo hi ven theih a nih thupawh sawiin, chumi atan chuan harsatna neih te hmuhchhuah hma leh enkawlna pek hma chu a pawimawh thu te, Thalaite zingah Earphone leh Headphone hmang kan tam tawh avangin 80 Decibel chin aia ring ngaihthlak chu Beng tan a that loh theih thu leh tul leh pawimawh bik avanga hman a ngai a nih pawhin minute 15 aia rei hman loh tur a nih thu te a sawi a. Mizote zinga ri hriatna lama harsatna nei mi thenkhat ten Bengdar an duh ang leh an hmuh remchan ang an lo hmang ve mai thin chu thil tha lo a nih thu leh Bengdar mamawh chuan mithiam te rawn chungin an Beng mil tawk ngei hman tur a nih thu te a sawi bawk a ni.

He hunah hian Serchhip DIET Principal Lalrammawia chuan hetiang hun pawimawh District Hospital thuneitu ten an buatsaih sak chu lawmawm an tih thu sawiin, zirlaite tan pawh thil tangkai a nih ngei a beisei thu a sawi a. Hemi hnu hian Serchhip DIET-a thawktute leh DIET-a Training mek te tan a thlawna Beng entirna neih chhunzawm nghal niin mi 42 ten an Beng an entir a, heng mite hi khawl hmanga an Beng te en niin Doctor ten an mamawh ang enkawlna an pe nghal bawk a ni.

Thudawn danin nikum (2021-2022) chhung khan Serchhip District Hospital-a ENT Department-a damlo inentir zawng zawng 2094 atangin mi 935 te chu ENT kaihhnawih a natna nei an ni a, heng zinga 674 te chu Beng leh ri hriatna lama harsatna nei te niin an zinga 315 te khawl hmangin an Beng enfiah sak an ni a, ri hriatna thalo mi 261 hmuhchhuah niin mi 74 te chu Beng dar hmang tura chawh an ni a, Beng leh ri hriatna lama harsatna lian neih avanga zai erawh an awm lo thung a ni.


Mizoram pumah hemi hun chhung hian ENT Department-a inentir mi 13,332 awmin an zinga 9102 te chu ENT kaihhnawih an ni thung a, an zinga 7349 te chu Beng leh ri hriatna lama harsatna nei an ni a, mi 2656 te chu Khawl hmanga an Beng enfiah sak ni bawkin 1830 te chu ri an hriatna a tha lo tih hmuh-chhuah a ni bawk a, mi 689 te chu Beng dar hmang tura chawh an ni bawk a ni.

Tun tum hi Serchhip District-a 'World Day of The Deaf' puala hun hman a nih vawi khatna a ni.

Comments

Popular posts from this blog

Tukverh-a tlasual boral