RTI huanga hmalakna Governor hnenah hrilh

Mizoram Information Commission (MIC) a Chief Information Commissioner (CIC) Lalnunmawia Chuaungo chuan nimin khan Larsap Hari Babu Kambhampati chu hmuin Right to Information (RTI) Act huanga hmalakna hrang hrangte a hrilh.

Raj Bhavan-a an inkawmna ah hian CIC Lalnunmawia Chuaungo chuan MIC in Section 4 of RTI Act a in ziak anga Suo Moto Disclosure ti hlawhtling tura sawrkar department te a hriattir chu zawm a hlawh thawkhat tih Governor hnenah hian a sawi a. Department tlem azawngin tun thlengah an la tih loh avanga an hotute insawifiah tura an koh mek thu a sawi. 

Suo Moto Disclosure awmzia chu Department hmalakna hrang hrang leh mipuiin an hriattur te RTI hmanga dil kher ngai lova department website a lo dah lawk leh a tul anga update a ni tih CIC chuan sawiin, RTI hmanga zawhna zawttu an tlem thin chu siamthat tumin RTI Online siam a nih thu leh hei hian RTI hmanga zawhna online kaltlangin a theih tawh avangin RTI tangkaina phawk chhuak turin zawhna te pawh a awm belh chho zel turah an ngaih thu Larsap hnenah hian a sawi a ni.

He hunah hian Governor Hari Babu Kambhampati chuan CIC leh a thawhpui te chu hna an thawk tha nia a hriat thu a hrilh a. DAA, SPIO leh SAPIO te nena inthlunna nghet zawk leh inbiakpawhna tha zawk an neih theih dan tur kawng dap zel turin a chah a. Sawrkar langtlang leh dik a awm theihnan RTI hmangtu Mizoram-ah an tam chhoh zel a beisei thu sawiiin, RTI Week hawnna October 6, 2022-a neih huna hmanpui tura CIC in a sawmna ah pawh tel ngei a tum thu a sawi a ni.

He inkawmna ah hian Mizoram Information Commission-a Information Commissioner (IC) Zorammawia bakah H. Dolianbuaia, Secretary MIC leh Lily, DS, MIC te pawh an tel bawk a ni.

Comments

Popular posts from this blog

Volleyball S/F khel dawn