Latest News

COVID-19 hri danna la thei chin zawng ten hri danna la vek turin Serchhip CMO in a sawm

Image
Serchhip District Chief Medical Officer Dr. Laldawngliana Sailo chuan COVID-19 chu theihtawp chhuaha kan do chung pawha kan do hnehloh a ni tih sawiin, chumi dona hmanraw pawimawh tak chu hri danna laka ni tih a sawi a, hri danna la thei chin te chu la vek turin a sawm bawk.

SEDP hnuaia Be lam ching hlawhtling lawmman pakhatna Serchhip District in a dawng

Mizoram sawrkar-a Agriculture Department chuan Sawrkar Flagship Programme, Socio Economic Development Policy (SEDP) hnuaia Vaimim leh Be lam chingtu hlawhtlingte hnenah nimin khan chawimawina hlanin Be lam chin leh tharchhuah kawngah Serchhip District chuan lawmman pakhatna a la a ni.

SEDP 2019-20 chhunga Vaimim leh Be lam chingtu hlawhtlingte chawimawina hun hi nimin khan Aizawl-a Agriculture Conference Hall-ah neih a ni a, he hun hi Agriculture Minister C. Lalrinsanga chuan hmanpuiin Sawrkar Flagship ngai pawimawh a, theihtawp chhuahtute zinga a ber nihna changtu leh lawmman dawngtute thinlung taka a lawmpui thu a sawi a. Ram hmasawnna atana ki pawimawh ber, thinlung lama intodelh tura harhtharna mipui zingah nasa taka thleng mek chu a hlut thu leh, hei hian chak taka min hruaiin hnam anga dinchhuahna min thlen ngei dawn thu sawiin, “Intodelh hi kan thinlunga awm, hman mai theih niin, Economic Independence hial min thlen thei a ni,” a ti bawk.

Agriculture Minister chuan tunhnaia Assembly Session-a Dan thar pass tak, The Mizoram Agricultural Land Leasing Bill chu Mizo kuthnathawktute tan liau liau a nih thu leh khawl chi hrang hrang hmanga ramneitu leh a hawhtu ten Dan fel tak hnuaia hlawk zawka tharchhuahna atana min kaihruai thei Dan a nih tur thu sawiin, vau beh fo Hnam ni tura din kan ni lo, a ti bawk a. Ni zung chakna (PM-KUSUM) tui Pump-na hmanga tharchhuah tipung tura Thal buh chin hmalakna kalpui tum a nih thu sawiin, Department pathum Agriculture, Irrigation & Water Resources leh Cooperation te Coordination Committee dinin lui tui pump theih verify a, WRC hmalakna kalpui tum mek a nih thu Minister chuan a sawi rualin, kum khat chhunga Crop hrang hrang rotation a kalpuiin thlai lam nasa taka tharchhuah tihpun nan he Solar tui pump hi hman tangkai a ni dawn tih a sawi bawk.

Agriculture Department chuan SEDP hnuaiah nikum 2020 khan Mizoram-ah Vaimim leh Be lam thlai thar a pun theihnan hma lain SEDP hnuaiah Vaimim chinna atan sum cheng nuai 212.74 hmuh a ni a. District 11 atanga farmer thlan-chhuah te hnenah Vaimim chin tir niin Quintal 13010.83 thar a ni a. Be lam thlai chi hrang hrang Chana, Bekang, Behliang leh Bean-thu te chinna atana SEDP atanga sum hmuh cheng nuai 160.90 hmangin Ram hectare 944.73 a zauah chingin Quintal 4870.33 thar a ni. Farmer te ruahmanna fel fai tak siamsak niin kawng hrang hrangah Farmers Interest Group (FIG) din niin mumal takin a huho in hma an la a ni.

Vaimim chin leh tharchhuaha lawmman pakhatna latu chu Saitual District a ni a, ram hectare 109.26 hmunah Vaimim chingin Quintal 2504 an thar chhuak a. Lawmman pahnihna latu Aizawl District chuan ram hectare 82.96-ah chingin Quintal 1855.19 an thar bawk a. Lawmman pathumna latu Lawngtlai District chuan ram hectare 121.40 atangin Vaimim Quintal 1710.71 an tharchhuak bawk a ni. Vaimim chin leh tharchhuahah hian Loneitu intelkhawm (Farmers Interset Group) tithate hnenah lawmman sem a ni bawk a. Hmarbawk zau, Zawngin leh Lungpuichawlhhmun, N. Lungpher, Saitual District ten pakhatna leh pahnihna dawngin Tualleng zau, Chamring, Aizawl District chu pathumna an ni a.  SEDP hnuaiah kum 2020 a vaimim tharchhuah Quintal 13010.83 atangin loneituten sum an lakluh chu Rs. 247,20,577/- vela chhut a ni.

Be lam chi (Pulses) chin leh tharchhuah ah lawmman pakhatna latu chu Serchhip District niin ram hactare 349.04-ah an ching a. Ram hactare 141.64-a chingtu Champhai District-in lawmman pahnihna leh hactare 60.70-a chingtu Lunglei District-in lawmman pathumna an la bawk a ni. Be lam chi (Pulses) chi hrang hrang atanga tharchhhuah chu Chana (Field Pea) Quintal 1778.02, Bekang (Soyabean) Quintal 1663.54, Arhar (Behliang), Quintal 962.11 leh Bean-thu (Rajmash) Quintal 466.66 a ni.

Comments

Chhiar Hlawhte