Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Chanchin thar thenkhat :

Scholarship sawihona nei

MMizo Students’ Union (MSU) General Hqrs. hruaitute chuan Pre & Post Matric Tribal Scholarship chungchângah nimin khan Mizoram Scholarship Board hotute kawmin zirlaiten kum 2020-2021 Scholarship an la hmuh loh chungchâng ah thil awmzia zawtfiahin an sawipui a. He hunah hian Mizoram Scholarship Board hotute chuan Central Ministry-in system thar a siam ‘New Procedure for Release of Fund’ State tinte zawm tura a tih chu Sept. 7, 2021 khan an dawng chauh tih sawiin, chumi bawhzui chuan Mizoram Scholarship Board chuan hma a la nghal char char tih an sawi a. MSU chuan tun thla chhung ngeia Scholarship hi sem chhuak tura ngenin, Mizoram Scholarship Board chuan tun thla chhung ngeia semchhuah an tum thu an sawi a ni.


MYC leh MZU thawkho dawn

Mizoram Youth Commission (MYC) leh Mizoram University (MZU) te chuan Skill Training, MZU in Online Learning & Online Prog-ramme hnuaia a buatsaih zinga thlanchhuah bik thenkhatah thawhhona thuthlung an ziak. He thawhhona thuthlung hi niminpiah khan MYC Conference Hall-ah ziakin MYC aiawhin Dr. Vanlaltanpuia, Chairman leh MZU aiawhin Prof. Lalnundanga, Registrar in a ziak a ni. He thawh-hona thuthlung ang hian MYC chuan Coure 5-ah Skill Training Programme hi MZU Online programme hnuaiah kum 2 chhung atan a sponsor thin dawn a, heng Skill Development Course te hi UGC in a pawmpui vek a ni.


Development Road laih rel

Mizo Zirlai Pawl (MZP) General Hqrs. leh Mizoram EarthMovers Owner’s Union chuan niminpiah khan Joint Meeting neiin Mizoram leh Assam ramri-ah Development Road laih nise tiin thawhho an rel a. Hemi ang hian MZP ten mipuite hnenah theih ang angin vehbur khawnin chu mi tlingkhawm hmang chuan Mizoram Earthmovers Owner’s Union te chuan hlawh leh hlawkna um lovin hna an thawk thung dawn a ni.


Police ngaihsak tawklo in hria

ZPM Thalaite chuan Mizoram sawrkâr-a Police Department-in Puan In (Tent) 30 leina tur Tender a chhuah chu lawmawm an tih rualin, thil hmanhmawhthlâk ni lovah Restricted Tender koh a nih fo lai a, ramri-a duty Police-te mamawh em em leina tura Mizoram sawrkârin tlaikhawhnu a Tender a ko chu pawi an tih thu an sawi a, sawrkar in Police a ngaihsak tawklo hle a an hriat thu an sawi bawk.


MNF in Candidate tur puang

Tuirial bialtu MLA, Andrew H. Thang-liana a boral avanga he bial-a Assembly bye-election neih turah rorellai MNF Party chuan MIZOFED Chairman nilai K. Laldawngliana, Aizawl Dinthar Veng chu an candidate a nih tur thu nimin khan Twitter kaltlangin an puang a, hemi chungchang ngaihtuah hian nimin khan Nomination Committee chu an thukhawm a ni.


RT-PCR bunna tur tlawh

Lunglei Sub-Hqrs. YMA hruaitute chuan Lunglei-a RT-PCR khawl bun a nih theihna tura Tourist Lodge, Lunglei Zotlang-a sawrkar in hma a lakna te chu nimin khan a hmunah kalin an en a. Nimin-a hnathawhna hmun an tlawh lai hian Sawrkar lam chuan RT-PCR dahna tur pindan lo siamremin pindan bang thenkhatte vuakthiah a ni a. Thawktu ten an sawi danin he hmun atanga thli luanna tur lamah leh a panna kawngah duhthu sam lo deuh harsatna a awm a, heng hi a kaih-hnawih PHE leh PWD lamah thlen tur a hrilhin, YMA pawhin a tul anga lo bawhzui pui an in huam thu an hrilh a ni.

YMA chuan RT-PCR khawl hi hman theih ngei an duh thu leh a tul anga sawrkar hmalak dan ngaihchan zel an tum tih Lunglei Sub-Hqrs. YMA Secretary Zothanzuala chuan a sawi a. Hemi kaihhnawih ah hian YMA chuan Vawiin hian All NGO Meeting an ko bawk a ni.

Comments

Chhiar Hlawhte