Latest News

Mizoram-ah hri kai hmuh belh zel an la ni

Niminpiah khan Mizoram-ah Sample 7156 enfiah leh niin heng atang hian COVID-19 hri kai 1380 hmuhchhuah leh an ni a, Sample enfiah zawng zawng atanga za zela 19.28 te chuan hri kaiin Mizoram-a hri kai hmuhchhuah zat ala tlahniam hlei thei lo a ni.

Niminpiah khan ZMC-a RT-PCR Laboratory-ah Sample 229 enfiah niin hri kai mi 340 hmuhchhuah an ni a, an vai hian Aizawl District-a Sample lak te vek niin Hunthar Veng-ah hri kai mi 43 lai hmuhchhuah niin hri kai mi 10 aia tam hmuhna Veng leh khua 9 lai ala awm bawk a ni. Fluorescent Immunoassay Test hmangin Aizawl-ah Sample 229 enfiah ni bawkin hri kai mi 55 hmuhchhuah an ni a, an vai hian Aizawl khawpui chhung ami te vek an ni bawk.

District hrang hranga TrueNat Laboratory-ah Sample 296 enfiah ni bawkin heng atang hian hri kai mi 47 hmuhchhuah an ni bawk a, an zinga 16 te chu Lawngtlai District ami te niin Lunglei District-ah 9, Champhai District-ah 8, Hnahthial District-ah 4, Kolasib leh Serchhip District-ah 3 ve ve leh Mamit leh Khawzawl District-ah hri kai mi pahnih ve ve hmuh an ni bawk.

Niminpiah khan Mizoram hmun hrang hrangah Rapid Antigen Test hmangin Sample 5182 enfiah ni bawkin hri kai mi 938 hmuhchhuah an ni bawk a, an zinga 495 te chu Aizawl District ami te niin Veng leh khua 85 atanga hmuh te an ni. Lunglei District-ah hri kai mi 154 hmuh niin Siaha District-ah 94, Kolasib District-ah 81, Lawngtlai District-ah 50, Hnahthial District-ah 30, Mamit District-ah 23, Saitual District-ah 7 leh Khawzawl District-ah hri kai mi 4 hmuh an ni bawk. Nimin-a Rapid Antigen Test hmanga hri kai hmuhchhuah tarlan zingah hian Ser-chhip District-a hri kai hmuhchhuah tarlan a ni ve lo thung a ni.

Mizoram-a COVID-19 hri kai zingah nimin khan tlai dar 5:00 thlengin mi 777 enkawl dam an awm belh leh a, heti hian nimin tlai dar 5:00 thlenga Mizoram-a hri kai hmuhchhuah chu 91,919 niin an zinga 76,182 te chu enkawl dam an ni tawh a, hei hi hri kai hmuhchhuah tawh atanga chhutin za zela 82.87 niin tunah hian hri kai enkawllai 15,431 an la awm mek a ni.

Hetihlai hian Mizoram-a COVID-19 hri kai te zingah nimin thleng khan boral an la awm belh zel a, nizan hmasa dar 8:30 khan Brenda Zorempuii, Lunglei Luangmual chu boralin ani hi ni 18 chauha upa niin Sept. 23, 2021 khan hri a kai tih hmuhchhuah a ni. Nizan hmasa zanlai pelh hnu dar 12:05 khan Zochhingi (85), Falkland Aizawl chu boralin hemi hnu dar 12:15 khan Saihnuna Sailo (85), Vaivakawn chu a boral ve leh a, heti hian nimin thlenga Mizoram-a hri kai boral chu mi 306 niin tun thla bikah nitin hri kai boral an la awm ziah a ni.

Comments

Chhiar Hlawhte