KVK-in Poshan Vatika Mahabhiyan an hmang

Nimin (September 17, 2021) khan KVK North Vanlaiphai (Serchhip District) chuan ‘Poshan Vatika Mahabhiyan & Tree Plantation Programme’ hmangin thlai chi leh a tiak chi hrang hrang semchhuah a ni.     Rampum huapa hman ‘Poshan Vatika Mahabhiyan & Tree Plantation Programme’ hi Anganwadi Workers leh loneitu thlanbikte nen Sawrkar SOP zawm chunga hman niin hun hmasa lamah Union Minister for Agriculture &Farmers’ Welfare, Narendra Singh Tomar-a hovin biak hmuh theihna hun hman niin hemi hnu hian KVK hrang hrang te chuan a hranin hun an hmang chhunzawm a. North Vanlaiphai KVK in hemi puala hun an hman hi Dr. T. Vanlalngurzauva, Senior Scientist & Head, KVK Serchhip chuan kaihruaiin he hun-a khuallian North Vanlaiphai VCP, Laltanpuia chuan khawtlang-a Aganwadi hmasawnna atan an hnathawhte tarlangin, kalkhawm te chu KVK atanga zirlai an zirchhuah te hmasawnna atana hmang chhunzawm turin a chah a ni.

    He hunah hian East Lungdar Block Horticulture Officer, PC. Lalnghahsangi chu khual zahawm niin thu a sawi bawk a, hemi hnu hian KVK North Vanlaiphai atangin K. Lalmalsawmi, SMS (Home Science) leh Vanlalruali, SMS (Agri. Extension) ten thupui thlan bik hmangin he huna tel te hi zirtirna an pe chhunzawm a ni. Nimin-a he hun hmanna ah hian N. Vanlaiphai-a Anganwadi Workers te leh N. Vanlaiphai leh Lungchhuan khuaa loneitu sawm bik an vaiin mi 30 vel an tel a, he huna tel te hi KVK chuan thlai chi leh thlai tiak te semin, chawhnu lamah thingtiak phunin hun hman chhunzawm a ni bawk.