Thlai thar phochhuahna tur Godown Minister in tlawh

Durtlang North-a Agriculture Godown hman tangkai tawh loh chu tuai thara Vegetable Supply Chain-a thlai thar phochhuah nana hman tangkai dan tur enpuiin Agriculture Minister C. Lalrinsanga chuan nimin khan a hmunah a tlawh.

Helai hmun a tlawhna ah hian Agricuture Minister chuan Aizawl khawpuiin thlai thianghlim ei tur a mamawhna sang takah hian AMC huamchhung leh pawn lama kuthnathawktute tan Market a tha tawk tih sawiin, “Hei hi kuthnathawktu ten hre thar leh ila; kan thar ve theih reng State dang atanga thlai kan la lut nasa lutuk hian kan economy a ti than thu mai ni lovin lakluh tam lutuk chuan kuthnathawh hi a nih dan tur angin a hlawk thei thin lo,” a ti a. “Kan thar ve theih reng hi chu I thar ve ila, chu chuan state dang atanga thlai lo lut tur hi a dang chat mai dawn a ni,” tiin “Panhnah ringawt pawh kan lalut tam lutuk a, tunah hma kan han la chho a, tam tham tak chu kan thar ve thei reng a ni tih kan chiang tawh a ni,” a ti bawk.

Durtlang North-a Agriculture Godown hi Square ft. 1800 a zau niin, a chhawnga sak a ni a. Vegetable Supply Chain ruahmanna kal mekah he building hi tangkai lehzuala hmangin Market changtlung tak din nan ruahmanna siam tum a ni a. Agriculture Minister chuan tunah hian Rabi Season kan lut chho dawn tih pawh sawiin, “Vegetable Market Chain siam tura kan hmalakna-ah hian Durtlang hian a thawhhlawk thei hle dawn a ni,” a ti bawk.