Chanchin thar thenkhat :

Sawrkar mi pawimawh hmu

Mizoram Lok Sabha MP C. Lalrosanga leh OSD to Chief Minister Rosangzuala te chuan nimin khan New Delhi-ah Union Home Secretary Ajay Kumar Bhalla leh Intelligence Bureau Director Arvind Kumar te hmuin India hmar-chhak biala thil awmdante bakah Myanmar-a thil thlengte leh raltlante chungchang an sawipui a. Myanmar atanga raltlante chhawmdawlna chungchangah tanpuina awm thei ang angte ngaih-tuah turin sawrkar laipui houtute chu ngenin, Mizoram leh Assam ramri buaina chingfel tura chak taka hma la turin an ngen bawk.

Sports Minister in Concurrent List-a Sports dah a rawt

Tunkar Thawhtanni khan Union Sports Minister Anurag Singh Thakura kaihhruaina hnuaiah Sports Ministers’ Conference chu biakhmuh-theihna hmanga neih a ni a, he hunah hian Mizo-ram Sports Minister Robert Romawia Royte chuan India rama Sports hmasawnna tak tak a thlen theih nan Sports chu India Constitution a State List atangin Concurrent List-ah dah a rawt a ni. Sports Minister Robert Romawia chuan Sports hmasawnna ruhrel din leh chak zawka Sports lama hma sawn turin Central Sawrkar leh State Sawrkarin sum leh tha an thawhdun a tul avangin Sports chu Concurrent List-ah awm se a tha zawk dawn a ni, a ti.

MPCC Candidate tur puang

Tuirial bial-a Assembly bye-election neih turah Mizoram Pradesh Congress Committee (MPCC) Nomination Committee chuan an MLA hlui Chalrosanga Ralte chu Candidate atan an ruat tih MPCC Thupuangtu Dr. Lallianchhunga chuan sawiin, hei hi MPCC President pawhin a pawmpui tawh thu a sawi bawk. Tarlan tawh angin Tuirial bialtu MLA Andrew H. Thangliana chu a boral avangin he bial-ah hian bye-election neih a tul dawn a, rorellai MNF Party chuan K. Laldawngliana chu an Candidate tur a nih thu an puang tawh bawk a ni.

MPYCC in pawi tih thu sawi

Congress Party Thalai, Mizoram Pradesh Youth Congress Committee (MPYCC) chuan Mizoram-ah COVID-19 hri leng mekin zual lam a pan emaw tih mai turin nitin hri kai thar sang chuang te hmuh-chhuah a ni ta zel tih sawiin, hetihlai hian COVID-19 vei na zual enkawlna tur, Intensive Care Unit (ICU) khum 34 chauh kan nei chu pawi an tih thu an sawi a. Kan dinhmun en hian COVID-19 vei na zual tan COVID Damdawi In khum chan chu thil harsa leh vana rah ang mai a tling hial chu pawi an tih thu an sawi a, Heng te hian Sawrkar chak tawk loh zia leh Health Minister Dr. R. Lalthangliana leh Medical Operational Team (MOT) Chairman Dr. ZR Thiamsanga ten a taka COVID-19 dona kawnga an thawh that lohna leh he natna na taka tuartute enkawlna tur siam kawnga an hlawhchham zia a lang niin an sawi bawk.

BJP Mizoram in thisen pe

BJP Mizoram Pradesh chuan ‘Seva Aur Samarpan Abhiyan’ an hman mek denchhenin nimin khan Aizawl-a an Party Office-ah a thlawna thisen pekna hun an buatsaih a, he hunah hian mipa 24 leh hmeichhia pakhat, an vaiin mi 25 ten thisen an pe a ni. Nimin-a BJP Mizoram Pradesh in thisen pekna hun an buatsaih ah hian an President Vanlalhmuaka chuan India ram ah Mizoram chu Health Facility nei thalo ber pawl kan ni tih sawiin, “Mizoram a Sawrkar tawh te reng reng hian Health Sub-Center leh Community Health Center te hi an hlamchhiah thin a, a hming lek hian an kalpui emaw tih mai tur a ni. Chutiangin zirna ah pawh a bulthut atanga hma kan lak that hi a ngai a ni,” tiin BJP te chuan a bulthut atanga siamthat chu an ngaih pawimawh ber a ni tih a sawi bawk.