Latest News

Chanchin thar thenkhat :

Speaker in Khawruhlian tlawh

Assembly Speaker Lalrinliana Sailo chuan tunhnaia a bial chhunga COVID-19 hripui inkai-darh nasatna Khawruhlian khua tlawhin Covid-19 avanga harsatna an tawk chu pawi a tih thu a sawi a, hripui leng do hneh tur chuan kan zavaia kan tanrual a tul takzet tih a sawi bawk. Khaw-ruhlian khuaah hian September ni 18, 2021 atang khan Covid-19 hri hi a darh tana hriat a ni a, Total Lockdown puan niin Contact Tracing-te neih nghal a ni a, chhungkaw 100 bawr vel Home Quarantine mek niin nimin thlengin Sample 58 endik tawh niin COVID-19 hri kai mi 19 hmuhchhuah tawh an ni. Assembly Speaker hian hri leng dona atana mamawh bungrua chi hrang hrang pawh a hlan nghal a, hemi hnu hian Khanpui khua pawh a tlawh bawk.


Chhawmdawlna damdawi hlan

Mizoram Chemist & Druggist Association (MC&DA) chuan Myanmar atanga Zohnahthlak raltlan te lo chhawmdawlna turin Damdawi chi hrang hrang case 46, cheng nuai 10 chuang man chu nimin khan Aizawl-a MZP Pisa Pui-ah an hlan a, he hunah hian MC&DA President R. Thanglura chuan kan unau raltlante tanpuina tura an luangchhuak thei chu lawmawm an tih thu a sawi a ni. MZP President B. Vanlaltana pawhin Myanmar atanga himna zawnga rawn raltlante chhawmdawlna kawngah Mizo te inlungrualna chuan rah tha a chhuah zel a beisei thu he hunah hian a sawi bawk a ni.


MPCB Chairman inhnukdawk

Mizo Students’ Union (MSU) General Hqrs. ten Mizoram Pollution Control Board (MPCB) Chairman atanga bang tura an ngen hnuah nimin khan MPCB Chairman R. Thanga chuan Environment, Forest & Climate Change-a Principal Secretary hnenah a hna atanga a inhnuhdawhna ziakin a thlen a, R. Thanga chuan, MPCB Chairman-a ruat a nihnaah thu inchuh a awm avangin ban mai tha zawka a hriat avangin hetiang hian thuthlukna a siam ta tih a sawi a ni.


Lunglei-a Kudam tlawh

Supply Minister K. Lalrinliana chuan nimin khan Lunglei-a PDC Godown chu tlawhin a din-hmun a enfiah a, mipui mamawh ber ei leh bar semtu an nih avangin mipui hamthatna dah hmasa zel turin a chah bawk. He hunah hian Lunglei District khawthlang lamah kawng chhia avangin buhfai phur lamah harsatna tawh mek anih thu tarlan niin NHIDCL, Supply Department leh PWD motor hmanga a semchhuah hna thawh mek zel anih thu tarlan a ni. Supply Minister hian nimin vek khan Lawngtlai a pan leh nghal a ni.


Covid Aid Material hlan

BJP Mizoram Pradesh President Vanlal-hmuaka chuan nimin khan West Lungdar khua tlawhin VLTF te hnenah Covid Aid Material (Face Mask 10, Sanitizer bur 2, Paracetamol Strip 2, Vitamins C with zinc, Detol Soap 2, ORS, Higiene Pack 2) a hlan a. Delhi-a Health Minister te zinin Union Minister hnena ZMC tih changtlunna te, Building sakna tur, anmahni hlawkna awm thei tur ang chauh mai an zuk dil thin te chu Union Minister te mak tih a nih thu he hunah hian a sawi bawk.


YLA dinchampha lawm

Nimin Sept. 23, 2021 kha Lawngtlai District chhunga Tlawmngai pawl lian ber, Young Lai Association (YLA) din champha vawi 47-na a ni a, YLA Day hi hripui leng karah a theih ang ang in hman a ni. Central YLA President HC. Vanlalruatpuia chuan YLA member leh ram mipuite chu YLA Day chibai bukin, ram in hun harsa a tawhlai hian YLA Member te chu ram leh hnam chhan tura an inpekna a hlu takzet tih sawiin, tan la sauh sauh turin a chah a ni. Central YLA chuan Lawngtlai a Damdawi In pathum ah an Day pualin tanpuina Rs. 3000 theuh an hlan bakah, raltlan damlo an kan bawk. Tun dinhmun ah Central YLA hnuaiah hian YLA Branch  110 awm mekin, Sub-Hqrs. 8 a awm a, YLA Member hi mi 46,000 vel an awm mek a ni.

Comments

Chhiar Hlawhte