Latest News

Motor Sports kaihhnawih Project thlen

Sports Minister Robert Romawia Royte chuan Tuirial hmuna Motor Sports leh a kaihhnawih project chungchang sawrkar laipui-a mi pawimawh te a sawipui.     New Delhi-a cham mek Sports Minister hian nimin leh niminpiah khan Rural Electrification Corporation (REC) Chairman & MD, Sanjay Malhotra chu kawmin he Project chungchang hi a sawipui a. He Motor Sports Project hi India leh hmarchhak pum huap pawha thalaite mamawh a nih thu sawiin, Mizo tlangval zingah Motor Sports zinga lar tak, Bike Racing-ah India rama champion 4 lai an awm tawh thu a sawi a. Mizoram sawrkar tan infrastructure lian tham siam a harsat avangin Motor Sports tlankawng leh a kaihhnawih ruhrel siam nan nuai 1000 mamawh a nih thu leh 75%, nuai 750 chu REC-in CSR Fund atangin thawh se, Source dang atangin nuai 250 chu State sawrkarin ngaihtuah dan a lo zawng ve ang tiin a rawt a. REC Chairman chuan nuai 500 chin chu a sanction thei a, nuai 750 lai a nih dawn avangin an lo inrawnkhawm vat tur thu leh an thutlukna chu an hrilh thuai tur thu a hrilh a ni.
    Sports Minister hian I-League Football khelh laia mamawh em em leh, inkhelh chhunga duty tur Ambulance pawh Aizawl FC tan a dil nghal a, REC Chairman Sanjay Malhotra chuan Aizawl FC chuan a phu tih sawiin, Ambulance leina tur nuai 16 santion nghal a nih tur thu a sawi a ni.

Comments

Chhiar Hlawhte