Latest News

Rotary Club of Aizawl in Health Minister hnenah hri leng dona atan Oxygen Concentrator 135 an hlan

Rotary Club of Aizawl chuan COVID-19 hripui dona atana hman turin Oxygen Concentrator 135 chu nimin khan Health Minister Dr. R. Lalthangliana hnenah an hlan a, hemi hmalam hian Baptist COVID Care Centre-ah Oxygen Concentrator hi 10 an hlan bawk a ni.

Rotary Club of Aizawl hian nimin khan Health Minister hi a Pisa-ah hmuin COVID-19 hripui leng thawhhnihna (Second Wave) Mizoram in nasa taka a tuar an hmuhin engemaw tih ve tur an nei ni a an hriat avangin Rotary India leh an thawhpui khawvel hmun hrang hranga mi te nen tang tlangin hma an la tih an sawi a. Health Department hotute nen an inrawn hnuah Oxygen Concentrator hi kan mamawh pawimawh berte zinga mi a nih avangin pek an rel thu leh Health Minister hnena Oxygen Concentrator 135 an hlan bakah hian Health Minister-in a ngen angin Baptist COVID Care Centre, Christian Hospital, Serkawn-a hman tur Oxygen Concentrator 10 pawh niminpiah-a an hlan thu an sawi a. Mizoram in hripui leng a dona kawnga a mamawh thildangte pawh ngaihtuah zel an tum tih sawiin, thenawm ram atanga raltlan rawn tlanchhiate tan pawh a theih ang anga luangchhuak turin ruahmanna an siam tawh tih an sawi bawk.

Health Minister Dr. R. Lalthangliana chuan Mizoram in hripui nasa taka kan tawrh laia kan mamawh tak a hun taka Rotary Club of Aizawl ten an pe chu thinlung takin a lawm tih a sawi a, Mizoram mipuite leh Health Department aiawhin lawm takin a dawng tih sawiin, Rotary Club of Aizawl mai bakah an hmunpui lama an hotute leh an thawhpui zawng zawngte chungah lawmthu a sawi bawk.

Rotary Club of Aizawl in nimin-a Health Minister hnena Oxygen Concentrator an hlan hi pakhat cheng nuai khat (1) man niin, a vaiin cheng nuai 135 hu a ni a, niminpiah lama Christian Hospital, Serkawn-a an hlante nen hian a vaiin Oxygen Concentrator 145, cheng nuai 145 man hlanin Oxygen Concentrator pakhat hi litre 10 dawng zel a ni a. COVID-19 hri kaite enkawlna hmun hrang hrangah sem darh leh tur a ni ang.

Comments

Chhiar Hlawhte