Latest News

Mizoram-ah raltlan an la rawn luh belh zel

Mizoram hmun hrang hrangah Myanmar atanga raltlan an la rawn luh belh zel a, Champhai District-ah raltlan 2,600 chuang an awm mek nia chhinchhiah a ni.

Myanmar ram buaina avang hian Inrinni khan Vaphai-ah Hakha leh Kaleymyo atangin mi 22 lo luh belh lehin Farkawn leh Vaphai kai-ah chauh Lei inkhai (suspension bridge) a awm avangin Tiau lui lian in raltlan lo luh tumte harsatna a siam a, chubakah hri kai an awm avangte, Myanmar ramchhunga an Lo enkawl tul hunlai a nih avangte in raltlan lo lut hi an tlem nia ngaih a ni a, raltlan zingah hian COVID-19 hri kai mi 43 an awm mek a ni.

Hetihlai hian Zawlsei, Fârkawn, Vaphai, Khuangthing, Dungtlâng, Thekte, Thekpui, Leithum, Sesih, Sazêp, Khuanglêng leh Vanzau khua-ah te chuan raltlante awm lailawkna tur Relief Camp sak a ni a, heng hmun ah hian mi 2,000 chuang dah theihna tur a ngaih a ni a, a tul angin hri kai leh kai lo endikna hmun leh inkhunghranna hmun atana hman a nih dawn bakah chhungte belh tur nei velote tan pawha hun engemaw chen awm theihna atana duan a ni.

Tunhnaia raltlan luh tamna, Hnahthial District lamah chuan ni 3 chhung vel chu raltlan an rawn luh belh rihlo nia thudawn niin tunah hian Hnahthial District chhungah raltlan 2,069 an awm mek a, an zingah hian chhungkua 352 an tel a. Thingsai-ah 864; Cherhlun-ah 160; Bualpui 'H'-ah 151; Ngharchhip-ah 150; New Ngharchhip-ah 436; Tarpho-ah 86; South Chawngtui-ah 20; Khawhri-ah 69; Tuipui 'D'-ah 40 leh Hnahthial-ah 93 an awm mek a ni. Heng bakah hian Lawngtlai District-ah pawh raltlan hi 1,900 vel an awm ni a hriat niin nimin khan Myanmar ram MP paruk leh MZP Gen. Hqrs. aiawhten an tlawh bawk a ni.

Comments

Chhiar Hlawhte