Serchhip khawpui-ah bawlhhlawh thliarhran kalpui ve tawh turin ruahmanna siam a ni

Azaadi Ka Amrit Mahotsav Plan hnuaia hmalakna kal mekah nimin khan Serchhip-a Village Council Member te tan Bawlhhlawh sawngbawl dan inzirtirna neih a ni a, Serchhip khawpui chhungah pawh bawlhhlawh paih turte thliarhran a nih tawh dawn thu he hunah hian tarlan a ni.

UD&PA Conference Hall, Serchhip-a Bawlhhlawh sawngbawl dan inzirtirna hun hi UD&PA-a District Urban Development Officer (DUDO) Dr. Albert Vanlalliantluanga chuan kaihruaiin Mizoram khawpui dangte angin Serchhip-ah pawh Bawlhhlawh thliar hran tur anih tawh dawn tih sawiin, heng bawlhhlawh sawngbawlna tur hian Solid Waste Management Centre pawh peihfel thuai tura hmalak mek anih thu leh tunah hian hnathawh tur atanga zaa 12 vel thawh a nih tawh thu a sawi a. Serchhip khawpui-a bawlhhlawh te chu chi thum (3)-ah then anih dawn thu sawiin, Tawih thei, tawih theilo leh Plastic Waste-ah te then hrangin, bawlhhlawh bawm hran a paih tur a ni tih a sawi a, heng bawlhhlawh zinga Plastic atanga thil siam eng chi pawh sawngbawlna turin Serchhip DC hmalakna in Plastic her sawmna khawl pawh an neih tawh thu leh, Mizoram-a a nei hmaber an nih thu leh North East-ah pawh a nei hmasa ber dawttu an nih thu a sawi bawk a, Solid Waste Management Centre peihfel anih hunah tangkai taka hman anih dawn thu a sawi bawk.

Serchhip DUDO chuan bawlhhlawh sawngbawlna hmun tur chu a peihfel hun la hla deuh niin lang mahse bawlhhlawh thliarhran dan chu tun atanga kan inzir a ngai tih a sawi a. Waste Management Centre peihfel anih hunah chauh bawlhhlawh thliar hrang lovin tun atanga kan lo kalpui tan anih chuan peihfel anih hunah tumah inzirtir ngai tawh lovin, Mizoram hmun danga an lo buaina thin chu kan pumpelh thei dawn tih a sawi bawk.

Azaadi Ka Amrit Mahotsav Plan kalpui mek ah a ni 6-na chu Bawlhhlawh a bawm-ah chauh tiloh, hmun danga paih phal loh ni, ‘No Tolerance Day’ hman anih dawn thu te, hemi ni hian Bye-Law khauh taka kenkawh anih dawn thu leh bawlhhlawh a bawm a paihlo te chu Dan hmanga pawisa chawitir an nih dawn thu te a sawi a. Serchhip-a Village Council Member te bakah mipui zawng zawngte Faina kawnga tan la thar tura thawhpui ah sawmin, Mizoram-a District fai ber ni tura tan la thar turin a sawm bawk.

Nimin-a he hun hmanna ah hian Lawmzuali, Manager NULM UD&PA Serchhip chuan Waste Management tih thupui hmangin kalkhawm te zirtirna pein Serchhip khawpui chhunga VC te an tel tha hle a ni.

Serchhip Town Joint Village hruaitute kaihhruaina hnuaiah Serchhip UD&PA Department hnuaia Sanitation Worker thawk tha thlanna neih niin Sanitation Worker tha ber atan Mipa-ah Lalrinngheta leh Hmeichhia-ah K. Kapthuami te thlan an ni a, October 2, 2021-a Azaadi Ka Amrit Mahotsav Plan kharna hun ah Serchhip DC in lawmman a hlan dawn a ni.

Nimin-a he hun hman zawh a nih hnu hian chawhnu lamah Azaadi Ka Amrit Mahotsav Plan kalpui mek hnuaiah Kawtthler-a Faina kawnga inzirtirna hun, Mobile Van Campaign neih a ni bawk a, New Serchhip College Peng atanga bul tanin IOC Veng-a DC Office peng bakah Serchhip Bazar-ah te hun hman a ni a, he hun hi Serchhip DUDO, Dr. Albert Vanlallian-tluanga chuan kaihruaiin NULM-a Manager Lawmzuali chuan mipuite zirtirna a pe a, zaithiam te nen he hun hi hman a ni.

Azadi Ka Amrit Mahotsav (AKAM) hi Mizoram District hrang hrangah pawh kal-pui mek a ni a, UD&PA Department hnuaia he hmalakna kalpui mekah hian tunkar chhung hian hmalakna chi hrang hrang kalpuiin faina leh thianghlimna bakah bawlhhlawh paih dan chungchang te inzirtirna neih a ni dawn a ni.