Inkhuahkhirh zui zel a ni dawn

COVID-19 hrileng avanga Mizoram a inkharkhip kalpui mek chu tlema siam danglamin thla thar, October ni 2 thlenga hmanzui turin pawhsei a ni a, inkaihhruaina thar ah Picnic Spot chu CAB uluk taka zawm chungin hawn phal a ni a. Amah-erawhchu tum khatah mi 25 aia tam punkhawm phal a ni lo a, Bazar leh Dawr hawn dan tur tarlan zinga Group C te chu ni li (Thawhlehni, Nilaini, Zirtawpni leh Inrinni) hawn phalsak an ni bawk.

    Serchhip District Bawrhsap Lalmuan-sanga Ralte pawhin nimin khan thupek tichhuak nghalin Mizoram sawrkar DM&R thuchhuah angin Oct. 2, 2021 thlengin inkhuahkhirhna hi kalpui tur a nih thu a tarlang a. Inkaihhruaina hmanlai te chu kalpui chhunzawm tura tih niin Bazar leh Dawr hawn chungchangah Veng bil a inkhuah-khirhna hranpa neih a ngai a nih chuan VLTF ten District Bawrsap hnenah rawtna an thlen theih tur thu tarlan a ni bawk.