Latest News

Mizoram-ah AB-PMJAY bill 51,096 lut tawhin cheng vbc. 27 chuang pekchhuah a ni tawh

Mizoram-a AB-PMJAY kalpui a nih October 1, 2018 atanga kumin March 31 thleng khan Mizoram-ah damdawi-a inenkawlna Bill 51,096 lut tawhin heng Bill atang hian cheng vbc. 27 chuang pekchhuah a ni tawh.

Mizoram-a damlo ten a thlawna an damdawi In awmna senso an bill let leh theihna, AB-PMJAY kum thum tlin pualin nimin khan AROGYA Manthan 3.0 chu Taxation Auditorium, Aizawl-ah neih niin he thu hi tarlan a ni a. AB-PMJAY hi Prime Minister Narendra Modi-a’n a duan chhuah niin October ni 1, 2018 atang khan Mizoram-ah hman tan niin he Scheme-in a huam chin Socio Economic Caste Cencus (SECC) 2011-a Deprive List-a awm, Golden Card leh PM Letter nei damlo ten kumtin cheng nuai 5 zel an bill theihna a ni a. Oct. 1, 2018 atanga Sept. 30, 2019 khan Mizoram-ah Bill 21,946 turin heta tang hian Rs. 17,71,43,623/- pekchhuah a ni a, Oct. 1, 2019 atanga September 30, 2020 thleng khan Bill 22,246 lut lehin Rs. 21,28,95,130/- pekchhuah leh a ni a. Oct. 1, 2020 atanga kumin March 31 thleng khan Bill 6,904 lutin Rs. 8,14,40,868/- pekchhuah leh a ni bawk.

Nimin-a AB-PMJAY kum thum tlin lawmna hun hi Mizoram State Health Care Society-a Principal Executive Officer, Dr. Chawngthanchhunga chuan kaihruaiin he hun hmanpuitu Health Secretary R. Lalramnghaka chuan Mizoram sawrkar chuan mipuite hriselna a ngai pawimawh hle tih sawiin, damloh nikhuaa mipuite inenkawlna senso bill let kawngah pawh theihtawp a chhuah mek zel thu leh AB-PMJAY pawhin tluang taka kum thum hmel hial a hmu chu lawmawm a tih thu a sawi bawk. Health Secretary chuan mipui zinga AB-PMJAY la hmelhriat mumal lo te pawh ngaihtuahna senga he thil hi ngaihven thar leh turin a chah a, India ram Small State zingah Claim Submission titha ber dawttu a Civil Hospital, Aizawl thlanchhuah a ni chu lawmawm a tih thu pawh sawiin, thawktute pawh hmasawn zel tura fuihin harsatna an neih pawha an tana sawrkar a inhawn reng thu a sawi a. Health Secretary hian AB-PMJAY enkawl kawnga tithate hnenah lawmman a sem nghal bawk a ni.

Mizoram State Health Care Scheme chu kumtin enrolment renew ngai a nih laiin AB PM-JAY hnuaia Golden Card erawh chu kum tina renew ngai a ni lo thung a. He Scheme hnuaia hamthatna awmte a tam thei ang berin an chhawr tangkai theihna turin mahni veng/khua Sub-Centre theuhah mipuiten lo ngaihven turin sawrkar chuan a chah bawk a ni.

Comments

Popular News (Last 30 Days)