School Education Minister in COVID-19 vanga Lockdown tuar ber an nih thu a sawi

School Education Minister Lalchhandama Ralte chuan Education Department chu COVID-19 hripui leng avanga lockdown tuar ber an ni tih a sawi.

Human Resources Development Board bultuma School Education Department hnuaia Directorate – School Education, SCERT, MBSE leh Mizoram IT Society te tangkawpin School Head leh Education hnuaia Administrator-ho te tana 'Webinar on ICT enabled School Management for Educational Administrators and Head of Institution' an buatsaih a hmanpuina ah he thu hi sawiin Education Minister chuan hripui leng avanga Lockdown kalpui a nih avangin zirna In hawn theih a ni lova, thawktuten chawl mai lova Information Communication Technology hmang tangkaia zirtirna an kalpui thei chu a lawmawm takzet a ni, a ti a. Khawvel hmasawnna ruala ke pen theihna turin kum 1984-ah Educational Technology Cell Mizoram-ah din a lo ni tawh tih sawiin, School te hman tangkai turin Computer thahnem tak School 288 hnenah pek a lo nih tawh thu a sawi bawk.

Minister chuan Lockdown avanga zirna pangngai kalpui theih a nih loh avangin sawrkarin ruahmanna chi hrang hrang kalpuiin, Alternative Calendar-te, Bridge Course-te, Video Clip te siamin Tutorial Class te pawh a siam a ni tih a sawi a. Rualkhai zawka Online zirtirna kalpui a nih theihna turin Human Resources Development Board, Govt. of Mizoram chuan 21st May, 2021 khan Online Education Committee dinin, anni hmalakna hian zirna In-a ICT tihhmasawn nan ruahmanna cheng vbc. 152 hmachhawp kalpui mek a ni tih a sawi bawk.